У Магілёўскім абласным тэатры лялек 21 і 22 лістапада пройдзе прэм'ера спектакля «Дон Кіхот» (12+).
Рэжысёр Алег Лабозін прадставіць спектакль для сямейнага прагляду паводле п'есы Яўгена Шварца, напісанай паводле твора знакамітага рамана Сервантэса.
Дон Кіхот. Той самы Рыцар Сумнай Выявы. І тое самае падарожжа з верным сябрам і збраяносцам Санча Пансо.
Два таварышы адпраўляюцца ў гэтае падарожжа, каб выратаваць людзей ад злых чараўнікоў, лютых драконаў і разнастайных брыдкіх пачвар. Але на сваім шляху яны сутыкнуцца з рознымі чалавечымі заганамі - баязлівасцю, сквапнасцю, подласцю і нават са звычайнай няўдзячнасцю і здзекам.
І гэтыя «ветраныя млыны» працягваюць круціцца ва ўсе часы. І наганяльны імі вецер стаў настолькі звыклы, што ўзнікае пытанне - а ці патрэбен нам «рыцар на белым кані», ці патрэбен нам Дон Кіхот?
