Фэст у стылістыцы эпохі ранняга Сярэднявечча прайшоў 19 верасня ў аграгарадку Радамля каля Замкавай гары. Шмат стагоддзяў таму гэта мястэчка было сапраўднай сталіцай старажытнага славянскага племені радзімічаў. Археолагі сцвярджаюць, што людзі тут пачалі сяліцца яшчэ паўтары тысячы гадоў таму. А сёння тут музей пад адкрытым небам. тэатралізаванае прадстаўленне, майстар-класы па старадаўніх рамёствах, этнаквесты: знаёмствы з традыцыямі славянскага племені арганізатары фэсту пастараліся зрабіць займальнымі для ўсіх узростаў. А яшчэ выступленне ансамбля гістарычнай музыкі «Вір», маладзецкія забавы, баі клубаў гістарычнай рэканструкцыі, кірмаш і дэгустацыя страў нацыянальнай кухні. Этнасвята праходзіць у музеі пад адкрытым небам, дзе адноўлена капішча з драўлянымі скульптурамі славянскіх ідалаў, уладкавана некалькі паўзямлянак, пабудаваных у стылі Х стагоддзя, з глінабітнымі печамі. Госці свята асвойвалі азы рамёстваў, якімі займаліся нашы продкі ў X–XII стагоддзях: ткацтва, ганчарства, прыгатаванне традыцыйных страў.
Пры выкарыстанні матэрыялаў актыўная гіперспасылка на mogilev-region.gov.by абавязковая
