Тэлемост з удзелам усіх рэгіёнаў краіны і круглы стол на тэму «Дзень народнага адзінства як сімвал кансалідацыі беларускага народа» адбыўся ў Нацыянальным гістарычным музеі. У рэжыме анлайн да дыялогу падключыўся і Магілёў. Мерапрыемства прайшло з удзелам спікера верхняй палаты парламента Наталлі Качанавай, дыпламатаў, палітолагаў, прадстаўнікоў міністэрстваў і ведамстваў, Акадэміі кіравання пры Прэзідэнце.
Наш рэгіён прадстаўлялі намеснік старшыні Магілёўскага аблвыканкама Валерый Малашка, дырэктар Магілёўскага абласнога краязнаўчага музея імя Еўдакіма Раманава Віктар Анненкаў, кіраўнікі рэгіянальнага ўпраўлення адукацыі, мясцовых СМІ, дэпутаты.
На пляцоўцы Нацыянальнага гістарычнага музея адбылося адкрыццё выставы, прысвечанай падзеям у краіне 1921–1939 гадоў. Былі прадстаўлены рэдкія дакументы Нацыянальнага архіва, прадметы побыту, кнігі, газеты. Падобныя па тэматыцы экспазіцыі падрыхтаваны і ў рэгіёнах. У Магілёўскай вобласці гэтым займаўся абласны краязнаўчы музей. Выставу прапанавалі на трэцім паверсе Палаца культуры вобласці. Экспазіцыя будзе працаваць на працягу двух месяцаў.
На пляцоўцы тэлемоста прэзентавалі кнігу пісьменніка, даследчыка, гісторыка, лаўрэата прэміі «За духоўнае адраджэнне» Уладзіміра Ліхадзедава «17 верасня –Дзень народнага адзінства».
Галоўнай тэмай круглага стала абмеркаванне значэння даты 17 верасня 1939 года для гісторыі беларускага народа і беларускай дзяржаўнасці.
Пры выкарыстанні матэрыялаў актыўная гіперспасылка на mogilev-region.gov.by абавязковая
