Пытанне: Якія гарантыі прадастаўляюцца «ўнутраным» сумяшчальнікам, якія працуюць на адной і той жа пасадзе, пры накіраванні іх на курсы павышэння кваліфікацыі, прадастаўленні працоўных адпачынкаў і аплаце бальнічных лістоў?
Сумяшчальніцтвам з’яўляецца выкананне работнікам у вольны ад асноўнай працы час аплатнай працы ў таго ж (унутранае сумяшчальніцтва) або ў іншага (іншых) наймальніка (наймальнікаў) (знешняе сумяшчальніцтва) на ўмовах іншага працоўнага дагавора (частка першая артыкула 343 Працоўнага кодэкса Рэспублікі Беларусь (далей – ПК)).
У адпаведнасці з нормамі артыкула 349 ПК гарантыі і кампенсацыі, прадугледжаныя работнікам, якія сумяшчаюць працу з атрыманнем адукацыі, прадастаўляюцца толькі па асноўным месцы працы.
Іншыя гарантыі і кампенсацыі, прадугледжаныя ПК, іншымі актамі заканадаўства, калектыўнымі дамовамі, пагадненнямі, іншымі лакальнымі прававымі актамі, прадастаўляюцца працуючым па сумяшчальніцтве ў поўным аб’ёме.
У адпаведнасці з часткай першай пункта 2 Палажэння аб гарантыях работнікам, якія накіроўваюцца наймальнікам на прафесійную падрыхтоўку, перападрыхтоўку, павышэнне кваліфікацыі і стажыроўку, зацверджанага пастановай Савета Міністраў Рэспублікі Беларусь ад 24.01.2008 № 101, пры накіраванні работнікаў на перападрыхтоўку, павышэнне кваліфікацыі і стажыроўку ў вочнай (дзённай) форме навучання, на ўвесь перыяд праходжання імі навучання захоўваецца сярэдняя заработная плата па месцы працы.
Калі работнік працуе па ўнутраным сумяшчальніцтве на адной і той жа пасадзе, то на навучальныя курсы ён накіроўваецца адначасова па кожнай з пасад з захаваннем сярэдняга заробку па кожнай пасадзе асобна па асноўным месцы працы і па сумяшчальніцтве.
За час працоўнага адпачынку за работнікам таксама захоўваецца сярэдні заробак (артыкул 175 ПК). Пры гэтым у адпаведнасці з нормамі артыкула 347 ПК працоўны адпачынак працуючым па сумяшчальніцтве прадастаўляецца адначасова з працоўным адпачынкам па асноўнай працы.
Калі працягласць працоўнага адпачынку работніка па сумяшчальніцтве меншая, чым працягласць працоўнага адпачынку па асноўным месцы працы, наймальнік па просьбе работніка дае яму сацыяльны адпачынак адпаведнай працягласці без захавання заработнай платы.
Частка працоўнага адпачынку сумяшчальніка, якая перавышае працоўны адпачынак па асноўнай працы, па дамове паміж работнікам і наймальнікам можа быць заменена грашовай кампенсацыяй.
Дапамога па часовай непрацаздольнасці работнікам прызначаецца па кожным месцы працы (частка першая пункта 31 Палажэння аб парадку забеспячэння дапамогай па часовай непрацаздольнасці, па цяжарнасці і родах, зацверджанага пастановай Савета Міністраў Рэспублікі Беларусь ад 28.06.2013 № 569), гэта значыць па асноўным месцы працы і па сумяшчальніцтве.
