Анатоль Ісачанка: любая краіна моцная рэгіёнамі, асабліва, калі паміж імі наладжана ўзаемадзеянне

Пасяджэнне Камісіі Парламенцкага Сходу саюза Беларусі і Расіі па працы, сацыяльнай палітыцы і ахове здароўя прайшло сёння ў Магілёўскай вобласці. Перад яго пачаткам з членамі дэлегацыі правёў сустрэчу старшыня Магаблвыканкама Анатоль Ісачанка.

Асноўнай тэмай абмеркавання стала ўмацаванне супрацоўніцтва ў сацыяльнай сферы паміж рэгіёнамі дзяржаў - удзельніц Саюзнай дзяржавы Беларусі і Расіі. Як адзначыў Анатоль Ісачанка, Расійская Федэрацыя для Рэспублікі Беларусь з'яўляецца важнейшым і надзейным партнёрам ва ўсіх сферах жыццядзейнасці і вызначальная роля ў гэтым належыць міжрэгіянальнаму супрацоўніцтву. Так, толькі за апошнія тры гады аб'ём узаемнага гандлю Магілёўскай вобласці з Расіяй павялічыўся са 132 да 245 млрд расійскіх рублёў. Цяпер Магаблвыканкамам заключаны дакументы аб супрацоўніцтве з 28 расійскімі рэгіёнамі, рэалізуецца шэраг сумесных праектаў. Акрамя ўмацавання эканамічнай сферы, як адзначыў кіраўнік рэгіёну, увага ўдзяляецца рэалізацыі праектаў у сацыяльнай сферы - адукацыі і навукі, аховы здароўя, спорту і турызму.

«Сацыяльная сфера найбольш адчувальная для нашага насельніцтва, для насельніцтва Саюзнай дзяржавы. Сёння мы гаворым аб узаемадзеянні і тыя сацыяльныя выгоды, якія ёсць у адной краіне, павінны такімі ж быць і ў іншай краіне. Таму асноўная задача наша і парламентарыяў - стварыць умовы для таго, каб грамадзяне дзвюх краін у роўнай ступені карысталіся тымі дабротамі, якія ёсць у нашых дзяржавах, - падкрэсліў Анатоль Ісачанка, адказваючы на пытанні журналістаў пасля сустрэчы. - Прыемна, што сёння з парламентарыямі мы можам абмяркоўваць гэтую тэматыку, казаць пра тыя пытанні, пра тыя праблемы, якія існуюць і як іх трэба вырашаць, што Магілёў стаў нейкім пунктам прыцягнення - гэта важна.

Правільны акцэнт зроблены на рэгіёны, таму што рэгіёны заўсёды больш востра адчувалі тое, што неабходна для насельніцтва. Мы бліжэй. Мы знаходзімся ў непасрэдным кантакце з нашымі людзьмі. Мы чуем іх, імкнемся дапамагчы. І калі ўзнікаюць нейкія асобныя моманты, нам прасцей гэта данесці і сказаць, што насамрэч адбываецца. Парламентарыі, наведваючы Магілёўскую вобласць, могуць заехаць у бальніцу, паліклініку, школу, садок і паглядзець як мы жывем, што мы робім, як развіваемся. Мы ж са свайго боку, бываючы ў нашых калег, таксама цікавімся дадзенай тэматыкай. А сацыяльная сфера - гэта таксама наша моладзь, на якую неабходна звяртаць увагу. Мы мусім з ёй працаваць. Гэта наша будучыня. Таму я лічу, што дадзеныя сустрэчы на магілёўскай ці брэсцкай зямлі, бранскай ці смаленскай, вельмі важныя. Любая краіна моцная рэгіёнамі, асабліва, калі паміж імі наладжана ўзаемадзеянне».

Таксама звярнуў увагу Анатоль Ісачанка і на важнасць захавання гістарычнай памяці і праўды аб Вялікай Айчыннай вайне, агульнай гераічнай спадчыны: «На нашым Буйніцкім полі, якое стаіць разам са знакамітымі Куліковым, Барадзінскім, Прохараўскім палямі, адбылася бітва, дзе нашы дзяды і прадзеды паставілі заслон нямецка-фашысцкім захопнікам, даўшы магчымасць падрыхтавацца да абароны Смаленску і Маскве. Увекавечанне памяці аб подзвігу нашых народаў важна для сучаснай моладзі. Таму мы ствараем тут Музей Славы Магілёўскай вобласці, каб паказаць усю нашу гісторыю, прадэманстраваць, што ў нас ёсць, чым мы ганарымся і што нам ёсць куды і да чаго імкнуцца. Асобнай вяхой у ім будзе праходзіць гісторыя Вялікай Айчыннай вайны, адраджэнне пасляваеннага Магілёва. Будзе паказана, як зараз людзі працуюць і працуюць. Таму мы звярнуліся ў Саюзную дзяржаву, каб нам дапамаглі, і мы разам зрабілі гэты музей. Паколькі ён не толькі пра гісторыю Магілёўшчыны - гэта наша агульная памяць, наш агульны здабытак».

Падтрымала словы Анатоля Ісачанкі і старшыня Камісіі Парламенцкага Сходу па працы, сацыяльнай палітыцы і ахове здароўя Алена Афанасьева: «Я перакананая, што гэтае супрацоўніцтва не проста важнае, яно неабходнае для таго, каб у нашай Саюзнай дзяржавы была добрая, шчаслівая будучыня. Я заўсёды кажу, што мы крыху недаацэньваем магчымасці Саюзнай дзяржавы. І калі выканаўчыя і заканадаўчыя органы ўлады пра Саюзную дзяржаву, яе праекты і праграмы ведаюць больш, то нашаму насельніцтву мы павінны гэта трансляваць. Сёння грамадзяне Беларусі і Расіі могуць свабодна жыць, будаваць сваю прафесійную кар'еру, будаваць свае сямейныя адносіны спакойна, як на тэрыторыі Беларусі, так і на тэрыторыі Расійскай Федэрацыі. Так, у нас няма афіцыйнага статусу «грамадзянін Саюзнай дзяржавы», але па сутнасці мы ўсе грамадзяне Саюзнай дзяржавы і працоўныя, сацыяльныя, правы на атрыманне медыцынскай дапамогі, на далейшае пенсіённае забеспячэнне абаронены законамі Расійскай Федэрацыі і законамі Рэспублікі Беларусь.

Для таго, каб чалавек, атрымліваючы прафесію, будуючы свой кар'ерны, прафесійны шлях, разумеў - калі ён выконвае працоўны кодэкс, то ў адносінах да яго і працадаўца яго выконвае, незалежна ад таго ў Расіі гэта адбываецца ці ў Беларусі. Наша задача - уніфікаваць заканадаўства так, каб чалавек разумеў свае правы, ведаў свае абавязкі і нёс адказнасць. Але і ведаў, што ў адносінах да яго ў працадаўцы таксама ёсць адказнасць. Безумоўна, гэта галоўная задача, якую мы - дэпутаты Парламенцкага Сходу - павінны выбудаваць».

Таксама старшыня камісіі расказала, што ў рамках бюджэту Саюзнай дзяржавы рэалізуюцца значныя сацыяльныя, адукацыйныя праекты. У іх ліку - рэканструкцыя Брэсцкай крэпасці, будаўніцтва Ржэўскага мемарыяльнага комплексу і іншыя. «Таксама шэраг праектаў накіраваны на моладзь, пачынаючы з самага маленькага ўзросту. Гэта і развіццё творчых здольнасцей, і аздараўленне, і патрыятычнае выхаванне. Бюджэт Саюзнай дзяржавы поўнасцю нацэлены на тое, каб абараніць, дапамагчы і выхаваць. Акрамя таго, ёсць праграмы, якія датычацца бяспекі Саюзнай дзяржавы і абароны яе граніц, праграмы, накіраваныя на сферу аховы здароўя, - прадоўжыла яна. – Прыемна адзначыць, што адно з мерапрыемстваў набывае ў Магілёўскай вобласці пастаянную прапіску – гэта фестываль творчасці інвалідаў «Разам мы можам больш».

Алена Афанасьева падкрэсліла, што Саюзная дзяржава зацікаўлена аказваць садзейнічанне ў рэалізацыі праектаў, якія садзейнічаюць развіццю і ўмацоўваюць узаемаадносіны паміж яе ўдзельнікамі: «Мы, безумоўна, падтрымаем праект па працягу будаўніцтва музея на Буйніцкім полі ў Магілёве. Гэта цікава, правільна і патрэбна для нашай моладзі. Каб яны мелі магчымасць адчуць усю гэтую моц, якая дасць ім сілы рухацца далей. І спадзяемся, што такімі кантактамі мы будзем абменьвацца ўсё больш актыўна. Развіваць міжрэгіянальныя сувязі вельмі важна».

Працягам сустрэчы стала адкрыццё пасяджэння Камісіі Парламенцкага сходу па працы, сацыяльнай палітыцы і ахове здароўя. Сярод пытанняў - арганізацыя міжрэгіянальнага супрацоўніцтва краін на прыкладзе Магілёўскай вобласці з рэгіёнамі Расіі, а таксама аргпытанні па правядзенні ў 2024 годзе ў Магілёве фестывалю творчасці інвалідаў Саюзнай дзяржавы «Разам мы зможам больш».

Потым дэлегацыя наведала шэраг аб'ектаў абласнога цэнтра, каб азнаёміцца з іх дзейнасцю і сістэмай працы, у іх ліку - Беларуска-Расійскі ўніверсітэт, паліклініка №3, дзіцячы садок №118, абласны метадычны цэнтр народнай творчасці і культурна-асветнай працы.

Юлія Таранава, фота Галіны Гаўрыловіч