Цэнтр еўразійскіх даследаванняў імя А. А. Грамыкі адкрыўся ў БРУ

Урачыстая цырымонія адкрыцця Цэнтра еўразійскіх даследаванняў імя А. А. Грамыкі прайшла сёння ў Беларуска-Расійскім універсітэце.

Новы цэнтр – гэта навукова-адукацыйнае аб’яднанне Расійскага дзяржаўнага гуманітарнага ўніверсітэта і Беларуска-Расійскага ўніверсітэта. Адным з асноўных напрамкаў работы новага цэнтра стане правядзенне даследаванняў, прысвечаных інтэграцыйным працэсам у Саюзнай дзяржаве, ЕАЭС, СНД, ШАС, а таксама вывучэнне пытанняў бяспекі і ролі АДКБ, тэндэнцыі развіцця вялікай Еўразіі ў цэлым.

Як адзначыў рэктар БРУ Міхаіл Лусцянкоў, цэнтр будзе служыць умацаванню сяброўскіх і партнёрскіх адносін з Расійскім дзяржаўным гуманітарным універсітэтам. «У нас ёсць напрамак падрыхтоўкі студэнтаў «Замежнае рэгіёназнаўства». Гэта таксама паспрыяе больш якаснаму атрыманню неабходных кампетэнцый нашых студэнтаў як будучых кіраўнікоў міжнародных, беларуска-расійскіх праектаў. Упэўнены, што праца цэнтра ўвасобіцца ў рэалізацыю якасных навуковых і навукова-даследчых работ, – адзначыў ён. – Мне часта задаюць пытанне, чаму менавіта ў тэхнічнай ВНУ развіваецца сацыяльна-гуманітарны напрамак. У нас асаблівы ўніверсітэт – Беларуска-Расійскі, міждзяржаўная ўстанова адукацыі, адна з місій якой – развіццё культур нашых народаў. Кірунак «Замежнае рэгіёназнаўства» таксама гэтаму спрыяе. Мы навучаем студэнтаў, якія ў перспектыве павінны стаць кіраўнікамі беларуска-расійскіх праектаў. Для таго каб стаць паўнавартаснымі кіраўнікамі, трэба ведаць адзін аднаго, праводзіць сур’ёзную аналітычную працу, знаходзіць перавагі і недахопы ва ўзаемадзеянні. Стварэнне цэнтра на першапачатковым этапе – вучэбная праца, абмен выкладчыкамі, студэнтамі. У будучыні – рэалізацыя сумесных сеткавых адукацыйных праграм. Мы знаходзімся ў адзінай еўразійскай прасторы, таму неабходна працаваць у гэтым кірунку».

Паводле слоў прэзідэнта Расійскага дзяржаўнага гуманітарнага ўніверсітэта Яфіма Півавара, Саюзная дзяржава Беларусі і Расіі з’яўляецца адным з апорных элементаў будучыні нашых нацый, народаў, дзяржаў. «Яна прайшла праверку часам і цяпер дэманструе той прыклад супрацоўніцтва, які дазваляе пазбегнуць магчымасці ўнутраных цяжкіх наступстваў для нашых соцыумаў. Знешнія сілы хочуць аслабіць гэтую сувязь, – падкрэсліў ён. – Не толькі для навукі, адукацыі, але і сацыяльнага, грамадскага жыцця нашых народаў гэтая праца зараз вельмі важная. Яна мае велізарнае і беспрэцэдэнтнае палітычнае значэнне. ВНУ заўсёды працуюць на будучыню. Праз адукацыю будзем спрабаваць забяспечваць выхаванне будучага пакалення. На прыкладзе пазітыўнай спадчыны, якая ў нас ёсць. Сімвалічна, што цэнтр носіць імя Андрэя Андрэевіча Грамыкі. Ураджэнец Беларусі адначасова быў і чалавекам міру. Гэта дэманстрацыя пазітыўнага вопыту, які дастаўся нашым краінам ад савецкай сістэмы. І гэты вопыт трэба паказваць».

БЕЛТА