Гран-пры «Анімаёўкі-2022» атрымаў фільм «263 ночы» рэжысёра Ірыны Тарасавай

У Магілёве падвялі вынікі XXV Міжнароднага фестывалю анімацыйных фільмаў «Анімаёўка-2022». У трох конкурсах (анімацыйных фільмаў, дзіцячай анімацыйнай творчасці, дзіцячай выяўленчай і дэкаратыўна-прыкладной творчасці) вызначаны ўладальнікі больш за 20 хрустальных алоўкаў.

Конкурс анімацыйных фільмаў

«Вялікі хрустальны аловак» у намінацыі «Найлепшы анімацыйны фільм фестывалю» і Гран-пры прысудзілі фільму «263 ночы» рэжысёра Ірыны Тарасавай (Нацыянальная кінастудыя «Беларусьфільм», Беларусь, Расія, Ізраіль).

«Найлепшым эксперыментальным анімацыйным фільмам» прызналі «Ля гары, на гары, з гары» Ганны Кадыковай. «Найлепшы анімацыйны фільм для дарослых» – «Ванлаў» Барбары Якаўлевай. «Найлепшае выяўленчае рашэнне» – у фільма «Сустрэча» Аляксандры Крывалуцкай. Усе рэжысёры ўяўляюць ТАА Студыя «ШАР» (Расія).

Перамогу ў намінацыі «Найлепшы сцэнарый анімацыйнага фільма» прысудзілі фільму «Запісная кніжка Дарвіна» Жоржа Швіцгебеля, (GDS Studio, Швейцарыя), «Найлепшы рэжысёр анімацыйнага фільма» – «Каміле» Эрыка Ледзюна (Студыя Lardux Films, Францыя, Бельгія), «Найлепшае гукавое рашэнне анімацыйнага фільма» – фільму «Горад Паніка: летнія канікулы» Вінсента Патара і Стэфана Аб’е (Студыя Panique!, Бельгія, Францыя, Швейцарыя).

«Найлепшы дэбют» належыць фільму «Падарожжа з маім бацькам» Мора Ісраэля (Студыя su Art Productions, Ізраіль, Францыя). У намінацыі «Найлепшы студэнцкі анімацыйны фільм» не было роўных «Апноэ» Аляксандры Конанавай (ТАА Студыя «ШАР», Расія). «Найлепшы анімацыйны фільм для дзяцей» пад назвай «Самы страшны» зняў рэжысёр Павел Нікіфараў (ТАА «Кінакампанія “СНЕГА”», Расія). «Найлепшы беларускі анімацыйны фільм» – «263 ночы» Ірыны Тарасавай (Нацыянальная кінастудыя «Беларусьфільм», Беларусь, Расія, Ізраіль). «Найлепшым грамадзянска-патрыятычным анімацыйным фільмам» назвалі «Немагчымыя фігуры і іншыя гісторыі» Марты Паек (Студыя Animoon, Польшча, Канада).

Дыпломам «Майстру анімацыі» і прызам «Вялікі хрустальны аловак» за значны ўклад у развіццё анімацыі адзначылі сцэнарыста, драматурга, паэтку, рэжысёра анімацыйнага і ігравога кіно вышэйшай катэгорыі Алену Тураву, мастацкага кіраўніка студыі маладзёжнага кіно УП «Нацыянальная кінастудыя “Беларусьфільм”».

Конкурс дзіцячай анімацыйнай творчасці

«Малы хрустальны аловак» у намінацыі «Самы юны стваральнік анімацыйнага фільма» дастаўся фільму «Муха-чысцюха», створанаму Даніілам Дзячковым і Платонам Намдакавым пад кіраўніцтвам педагога Анастасіі Клачковай (Дзіцячая анімацыйная студыя «Diggie club», Беларусь).

Таксама сярод пераможцаў:

– «Найлепшая сцэнарная праца» – «Скнары» (Мацвей Пясецкі, Дзіцячая анімацыйная студыя «Diggie club», Беларусь);

– «Найлепшае гукавое рашэнне анімацыйнага фільма» – «Сіла адзінства» (Дзія М, Індыя);

– «Самы пазнавальны анімацыйны фільм» – «Году жураўля прысвячаецца» (Алена Абрамава, Андрэй Алейнік, Вячаслаў Белкін, Мацвей Сафонаў, Чо Вонгенг, Чо Ынэ, сярэдняя агульнаадукацыйная школа № 77, дзіцячая студыя мультыплікацыі, Расія);

– «Самы добры анімацыйны фільм» – «Каляровая казачная гісторыя» (Паліна Нахаенка, Ксенія Сачак, Сафія Міхасёва, Сафія Фядосава, Караліна Шпаковіч, сярэдняя школа № 17 Гомеля імя Франсіска дэ Міранды, Студыя «Анімацыйная студыя 17», Беларусь);

– «Найлепшы анімацыйны фільм» – «Раз марознаю зімой ...» (Аліна Вінаградава, Кацярына Дзенісенка, Аліса Федчанка, Варвара Варанкова, Гомельскі дзяржаўны абласны палац творчасці дзяцей і моладзі, аб’яднанні па інтарэсах «Свет фарбаў», «Хобі-ART», Беларусь);

– «Найлепшы беларускі анімацыйны фільм» – «Восень» (Вера Петрушэнка, Глеб Дробаў, Паліна Піркоўская, Соф’я Веер, Паўла Ружанцова, Гомельскі дзяржаўны абласны палац творчасці дзяцей і моладзі, аб’яднанне па інтарэсах «Свет фарбаў», Беларусь);

– «Найлепшы грамадзянска-патрыятычны анімацыйны фільм» – «Ой, Мішка!.. » (Яна Анцыферава, Расія»;

– «Найлепшы мастак анімацыйнага фільма» – «Падарунак для пачвары» (калектыўная праца, цэнтр анімацыйнай творчасці «Перспектыва», Студыя «Мульт-гарох», Расія).

Конкурс дзіцячай выяўленчай і дэкаратыўна-прыкладной творчасці

У намінацыі «Выяўленчая творчасць» ва ўзроставай групе 5–7 гадоў першае месца заняла праца «Я мастак, я так бачу» Элізы Раманенка з Магілёўскай дзіцячай школы выяўленчых мастацтваў. Ва ўзроставай групе 8–11 гадоў перамагла «Алена» Ганны Купцовай з Магілёўскай дзіцячай школы мастацтваў № 6. Ва ўзроставай групе 12–15 гадоў першае месца не прысуджана, а вось ва ўзроставай групе 16–17 гадоў не было роўных «Касмакату» Аляксандры Мышкоўскай, якая прадстаўляе Магілёўскі дзяржаўны эканамічны прафесійна-тэхнічны каледж.

У намінацыі «Дэкаратыўна-прыкладная творчасць» найлепшымі сталі «Сямейства каціных» Паўла Сапажкова з сярэдняй школы № 46 Магілёва (5–7 гадоў), «Вясёлы слон» Анастасіі Агеевай са шматпрофільнага цэнтра па працы з дзецьмі і моладдзю «Юнацтва» (8–11 гадоў), «Вожык у тумане» Аліны Жаўранкавай з сярэдняй школы № 37 Магілёва (12–15 гадоў), «Казкі цёмнага лесу» Ганны Аўхіменка з Магілёўскага дзяржаўнага эканамічнага прафесійна-тэхнічнага каледжа (16–17 гадоў).

СБ