Ігар Сергяенка: Беларусь ніколі не стварала праблем ні для суседзяў, ні для сусветнай супольнасці

Сустрэча з працоўнымі калектывамі Магілёўскай вобласці па актуальных пытаннях ваенна-палітычнай і сацыяльна-эканамічнай абстаноўкі прайшла сёння ў Палацы культуры вобласці. Удзел у ёй прынялі кіраўнік Адміністрацыі Прэзідэнта Ігар Сергяенка, старшыня Магаблвыканкама Анатоль Ісачанка.

Як адзначыў Ігар Сергяенка, людзі павінны разумець, што сёння адбываецца ў нашай дзяржаве і ў свеце, якія меры прымаюцца кіраўніцтвам краіны для абароны насельніцтва ад розных замахаў.

«Беларусь ніколі не стварала праблем ні для суседзяў, ні для сусветнай супольнасці, – падкрэсліў ён. – У Вялікую Айчынную вайну мы страцілі кожнага трэцяга чалавека і ведаем цану мірнага і бяспечнага жыцця. З таго часу, за мінулыя амаль 80 гадоў, мы прывыклі да спакою, дастатку і стабільнасці. Пры гэтым з моманту ўтварэння і набыцця незалежнасці наша краіна жыве і развіваецца ва ўмовах санкцыйнага ціску практычна ўвесь час. І ва ўмовах падвойных стандартаў з боку Захаду.

Дзякуючы адзінству грамадства, моцнай вертыкалі ўлады, палітычнаму курсу і граматнай палітыцы кіраўніка дзяржавы мы навучыліся працаваць ва ўнутраных і знешніх умовах, якія пастаянна змяняюцца. Дзяржава ў поўнай меры выконвае свае абавязацельствы, забяспечвае базавыя патрэбы насельніцтва ва ўсіх сферах. Мы не дапусцілі за гэтыя гады сацыяльнага расслаення грамадства, забяспечылі стабільную працу ўсіх прадпрыемстваў, стабільную заработную плату, захавалі калектывы і забяспечылі пераемнасць у іх.

У мінулым і ў гэтым годзе працягнулася ўзвядзенне дзясяткаў значных аб’ектаў па ўсёй краіне. І літаральна ў лістападзе ў розных кутках нашай краіны, ва ўсіх рэгіёнах, у тым ліку – і ў Магілёўскай вобласці, будзе адкрыта звыш 20 сацыяльных аб’ектаў: спарткомплексы, медустановы, дарогі, масты. Гэта адбываецца на нашых вачах. Проста часам мы жывём і ўспрымаем усё гэта як данасць, штодзённасць, а гэта сур’ёзныя капіталаўкладанні, сур’ёзная праца калектываў. Толькі на прыкладзе горада Магілёва мы назіраем актыўнае развіццё сацыяльнай сферы: шэраг аб’ектаў пабудавана, рэканструявана і па-сучаснаму абсталявана ў мінулым і ў гэтым годзе, запланавана ў наступным».

Ігар Сергяенка падкрэсліў, што ўсе сістэмы жыццезабеспячэння краіны цалкам закрываюць патрэбы насельніцтва, чаго не скажаш у дачыненні да асобных краін, якія аказваюць санкцыйны ціск на Беларусь. «І самае галоўнае, што ва ўмовах санкцый Беларусь нарошчвае аб’ёмы вытворчасці тавараў і паслуг, экспарт, пашырае рынкі збыту. Гэта цаной намаганняў у тым ліку і вашых калектываў, – акцэнтаваў увагу ён. – Не ўсе рады нашаму поспеху. Захад дае адкрыта зразумець, што ім не патрэбныя канкурэнты на сусветным рынку, ім не патрэбна стабільнасць у нашым рэгіёне і ў Беларусі ў прыватнасці. Наша краіна геаграфічна заўсёды была на стыку геапалітычных інтарэсаў вядучых сусветных ігракоў. Не па нашай волі мы раз-пораз аказваліся ўцягнутымі ў розныя ваенна-палітычныя спрэчкі і канфлікты. Узмацненне пазіцый Расіі і Кітая, нежаданне ЗША і краін-сатэлітаў мірыцца з шматпалярнасцю, спробы ЗША захаваць сусветнае панаванне, натуральна, вядуць да перадзелу існуючай сістэмы светапарадку і гібрыднага супрацьстаяння. З аднаго боку калектыўнага Захаду на чале з ЗША, з іншага – Расіі, Кітая і саюзнікаў. У першую чаргу Захад сваімі дзеяннямі стварыў перадумовы для, магчыма, самага буйнога ў гісторыі эканамічнага крызісу. Напэўна, з часу заканчэння Другой сусветнай вайны, сёння самае складанае і непрадказальнае дзесяцігоддзе, якое мы перажываем ўжо ў пачатку 21 стагоддзя. У гэтых умовах Захад спрабуе не толькі падпарадкаваць нас сваім інтарэсам, навязаць хаос, але і ўцягнуць у вайну».

Як расказаў кіраўнік Адміністрацыі Прэзідэнта, сёння адзначаецца інтэнсіўная мілітарызацыя краін НАТА, нарошчванне ля нашых межаў іх груповак, у прыватнасці – у Польшчы і Прыбалтыцы, павелічэнне ваенных бюджэтаў, пад’ём рынку зброі ў ЗША. Прыкметна актывізавалася агентурная дзейнасць замежных дзяржаў на нашай тэрыторыі. Пацвярджэннем гэтаму стала выяўленне і спыненне Камітэтам дзяржбяспекі Беларусі дзейнасці рэзідэнтуры ўкраінскіх спецслужбаў.

«Ёсць сілы, якія імкнуцца рэалізаваць сцэнарый каляровай рэвалюцыі і ўзброенай правакацыі ў нас у краіне. У 2020 годзе ў іх гэта не выйшла. І зараз яны разглядаюць толькі сілавое рашэнне пытання – праз дыверсіі, тэракты, дэстабілізацыю абстаноўкі ў краіне. Супраць Беларусі і Расіі разгарнулася самая сапраўдная гібрыдная вайна, – канстатаваў Ігар Сергяенка. – Яна адкрыта вядзецца і ў эканамічнай, і ў інфармацыйнай сферах. Сёння праз інтэрнэт ільюцца адкрытыя патокі хлусні на нашы галовы і часам складана разабрацца, асабліва моладзі, у гэтых хітраспляценнях інфармацыі. Таму адна з мэтаў нашай сённяшняй сустрэчы – данесці аб’ектыўную інфармацыю аб тым, што адбываецца і на знешнім контуры, і ў нас у краіне.

Беларусь нікому не пагражае і не хоча вайны. Але ў цяперашніх умовах, паслядоўна сваёй міратворчай пазіцыі і тактыцы ваеннага стрымлівання, ваенна-палітычным кіраўніцтвам краіны прымаюцца ўсе неабходныя меры па арганізацыі нацыянальнай бяспекі і абароны на той выпадак, калі нападаць будуць на нас. Мы надзейна прыкрываем сёння нашы паўднёвыя рубяжы. Акрамя гэтага, у межах калектыўнай бяспекі праводзіцца паэтапнае разгортванне рэгіянальнай групоўкі войскаў і сіл Рэспублікі Беларусь і Расійскай Федэрацыі, якое гатова да выканання задач па ўзброенай абароне Саюзнай дзяржавы. Каб жыць на сваёй зямлі і быць суверэннай дзяржавай, стварэнне нацыянальнай бяспекі і абарона Айчыны павінны насіць масавы, усенародны характар».

У якасці спікераў перад прысутнымі таксама выступілі прадстаўнікі сілавога блока: міністр абароны Віктар Хрэнін, старшыня Камітэта дзяржаўнай бяспекі Іван Церцель, Старшыня Дзяржаўнага пагранічнага камітэта Анатоль Лапо, ацэнку бягучай сітуацыі ў сферы эканомікі таксама даў міністр эканомікі Аляксандр Чарвякоў.

Меркаваннямі пасля мерапрыемства падзяліліся яго ўдзельнікі. Так, генеральны дырэктар ААТ «Магілёўліфтмаш» Сяргей Чарткоў адзначыў, што, нягледзячы на тое, што абстаноўка сёння складваецца няпростая, самае галоўнае, як заяўляў раней кіраўнік дзяржавы, усім працаваць на сваіх месцах і выконваць сваю працу якасна: «Што мы і робім: вырабляем сваю прадукцыю і прадаём яе. Мы ведаем і чуем, што сілавы блок, у выпадку неабходнасці, гатовы да ўсіх сцэнарыяў развіцця сітуацыі. І важна, што прадстаўнікі ўлады праводзяць падобныя сустрэчы і ад першай асобы расказваюць людзям аб рэальнай абстаноўцы. А для нашага грамадства самае галоўнае – гэта згуртаванасць і дысцыпліна на працоўных месцах. Санкцыі мы пераадолелі і будзем пераадольваць далей, успрымаючы як дадатковыя магчымасці для развіцця, якія неабходна выкарыстоўваць».

Яшчэ адна ўдзельніца сустрэчы – начальнік аддзела развіцця і маркетынгу ААТ «Магілёўскі мясакамбінат» Алеся Русаленка – заўважыла: «Як супрацоўнік перапрацоўчага прадпрыемства, разумею, што ад нас сёння патрабуецца зладжаная праца. І хачу адзначыць, што ў нашым калектыве няма перадумоў для панікі. Лічу, што такія сустрэчы абавязкова патрэбныя. Працоўныя калектывы павінны ведаць, якая сітуацыя складваецца ў краіне і ў свеце. Гэта трэба, каб мы маглі працягваць спакойна працаваць на карысць сваёй краіны.

Як мама, я хачу, каб нашы дзеці жылі ў мірнай, стабільнай, перспектыўнай краіне. Мой сын у хуткім будучым папоўніць рады абаронцаў Айчыны, вядома, мне важна разумець, што ў нашай краіне будзе захоўвацца мірная абстаноўка. І ён будзе служыць і разумець гэтую ўскладзеную на яго адказнасць».

Юлія Таранава, фота Галіны Гаўрыловіч