Магілёўская вобласць лідзіруе па колькасці электрадамоў

Дом ад разеткі

Магілёўская вобласць лідзіруе па колькасці электрадамоў: шматкватэрных ужо 19, а індывідуальных – каля 5 тысяч.

Першы электрадом у абласным цэнтры пабудавалі ў 2020 годзе па вуліцы Вароўскага. Адным з навасёлаў стаў намеснік старшыні камітэта па архітэктуры і будаўніцтве Магілёўскага аблвыканкама Аляксандр Харц. Сёння ён дзеліцца ўражаннямі: «Пакуль адны плюсы: ацяпленнем можна карыстацца на працягу ўсяго года, рэгуляваць пад сябе, не адчуваеш бытавыя нязручнасці падчас планавага адключэння гарачай вады. Колькі завесіць жыроўка, залежыць ад індывідуальнага рэжыму энергазберажэння: ці будзеце ўключаць тэмпературу па максімуме, адключаць ручнікасушыцель. Сёння гэта прыярытэтны напрамак у будаўніцтве жылля ў рэгіёне, і на тое цэлы шэраг прычын. Дзякуючы запуску БелАЭС наша краіна атрымала надзейную, эканамічную і экалагічную крыніцу энергіі».

Стаўка на электрычнасць

У 2022-м у Магілёўскай вобласці плануецца ўвесці каля 330 тысяч квадратных метраў жылля, больш за 60 тысяч «квадратаў» – электрадамы. У наступным годзе доля жылля, якое функцыянуе ад разеткі, яшчэ вырасце. Калі новы дом будуецца, умоўна кажучы, у чыстым полі, дзе адсутнічае цеплатраса, то стаўка цяпер робіцца на электрычнасць. Да прыкладу, новая забудова ў Магілёўскім мікрараёне Саломінка-2 будзе цалкам складацца з электрадамоў. РУП «Магілёўэнерга» забяспечыць будаўніцтва сілкавальнага цэнтра ў 110 кВ. Для электразабеспячэння гэтых дамоў энергетыкі прадугледжваюць павышаныя меры надзейнасці.

Начальнік аддзела архітэктуры і будаўніцтва Магілёўскага райвыканкама Уладзімір Ігнатаў пацвярджае, што ў раёне зараз сапраўдны бум на электрадамы сярод індывідуальных забудоўшчыкаў:

– З пачатку года да «электрацягі» падключылі больш за 90 дамоў. Прыблізна палова з іх – гэта новае будаўніцтва, а другая частка – перавод дамоў з пячным ацяпленнем на выкарыстанне электрычнай энергіі. Вядома, другое здзяйсняльнае пры ўмове тэхнічнай магчымасці. Сёння не ва ўсіх вёсках мадэрнізаваныя лініі электраперадачы. Тры гады таму мы правялі маштабную мадэрнізацыю ў 30 населеных пунктах, але тады гаворка ішла аб магутнасці электразабеспячэння на адзін дом 6 кВт. Па нормах для электраацяплення патрабуецца 12 кВт. У новых кварталах, дзе ідзе масавая забудова, праектам ужо былі прадугледжаны неабходныя магутнасці. У нас у 2022-м у раёне будуюць тры шматкватэрныя дамы – гэта добры паказчык. Яны будуць з цэнтральным ацяпленнем, але з электраплітамі. Што тычыцца індывідуальнага будаўніцтва, то да канца года будзе пабудавана 200–250 дамоў.

Плюс сотня ў месяц

У аграгарадку Цішоўка былі пабудаваны першыя электрадамы ў Магілёўскім раёне, навасёламі сталі шматдзетныя сем’і. Вольга Скрыпай ужо тры гады жыве ў такім катэджы і паспела ацаніць усе плюсы і мінусы:

– У нас 120 «квадратаў», чатыры прасторныя пакоі і кухня. За ацяпленне выходзіла каля 70 рублёў у месяц. Канвектары ў кожным пакоі аўтаномныя: я магу нейкі выключыць, дзесці адрэгуляваць тэмпературу. Сярод мінусаў – канвектар сушыць паветра, і мы купілі ўвільгатняльнікі. Але сёння ёсць мадэлі з клімат-кантролем, проста нам трэба было ўпісацца ў бюджэт, бо будаваліся па льготным крэдыце як шматдзетная сям’я.

Сярэдняе спажыванне кватэры ўзімку складае 1270 кВт/г на месяц. З улікам паніжанага тарыфу каля 4 капеек за 1 кВт/г кошт электраэнергіі выходзіць 50 рублёў.

У РУП «Магілёўэнерга» пацвярджаюць, што колькасць індывідуальных жылых дамоў, якія выкарыстоўваюць электрычнасць для патрэб ацяплення і гарачага водазабеспячэння, у рэгіёне пастаянна расце – плюс сотня ў месяц. Намеснік дырэктара па збыце энергіі філіяла «Магілёўскія электрычныя сеткі» Аляксандр Сяркоў расказвае, як ідзе праца ў гэтым кірунку:

– У зонах забудовы, дзе не прадугледжана цэнтралізаванае газазабеспячэнне, стараемся задаволіць усе заяўкі на электраатапленне. Калі прапускная здольнасць электрасетак не дазваляе падключыць дадатковыя магутнасці, то гэтыя сеткі ўключаем у план рэканструкцыі на наступны год.

Перавод аднакватэрных і блакіраваных жылых дамоў на выкарыстанне электрычнай энергіі для патрэб ацяплення, гарачага водазабеспячэння і прыгатавання ежы вядзецца ў межах Дзяржаўнай праграмы «Камфортнае жыллё і спрыяльнае асяроддзе» на 2021–2025 гады. Па ўказе № 127 Прэзідэнта «Аб кампенсацыі выдаткаў на электразабеспячэнне эксплуатуемага жыллёвага фонду» грамадзяне атрымалі права на пакрыццё з мясцовага бюджэту часткі выдаткаў за выкананыя работы па электразабеспячэнні. Пакрыццё расходаў ажыццяўляецца па завяршэнні работ па электразабеспячэнні, для чаго неабходна звярнуцца ў райвыканкам з заявай і прадаставіць неабходныя дакументы для ўключэння ў спісы. Кошт пытання – каля 2–2,5 тысяч рублёў на электразабеспячэнне і прыблізна ў такую ж суму абыходзіцца само ацяпляльнае абсталяванне. Калі параўноўваць з пячным ацяпленнем, то зручнасць, бяспека і экалагічнасць відавочныя. Часта выдаткі бяруць на сябе дзеці, каб зрабіць больш камфортным пражыванне пажылых бацькоў у доміку ў вёсцы.

Арыфметыка цяпла

У спажыўца сёння з’явілася больш варыянтаў пры выбары спосабу ацяплення і іншых камунальных выгод. Арыфметыка цяпла такая: калі звычайны тарыф на электрычную энергію складае 23 капейкі за 1 кВт/г, то ў электродоме – 4 капейкі (пры наяўнасці прыбора індывідуальнага ўліку расходу электрычнай энергіі), а калі ацяпленне цэнтральнае, але пліта электрычная, то тарыф – 19 капеек. Паводле падлікаў энергетыкаў, сярэднямесячнае спажыванне ў зімовы перыяд у шматкватэрных электрадамах 1276 кВт/г (51 рубель), у індывідуальных – 2100 кВт/г (84 рублі). Сезон вясна-лета ў шматкватэрных – 614 кВт/г (25 рублёў), на індывідуальных – 500 кВт/г (20 рублёў).

Дзяржаўнай праграмай «Будаўніцтва жылля» на 2021–2025 гады прадугледжана ўзвядзенне каля 2 мільёнаў квадратных метраў электражылля.

У аснову будзе пакладзена эканамічнае абгрунтаванне прымянення электрычнай энергіі ў сістэмах ацяплення і гарачага водазабеспячэння.

СБ