Магілёўская вобласць застаецца лідэрам ветраэнергетыкі ў краіне

У цяперашні час у Беларусі дзейнічае 109 ветраэнергетычных установак (ВЭУ), сумарная электрычная магутнасць якіх складае 114,9 МВт. Па колькасці і магутнасці ВЭУ лідзіруючыя пазіцыі займае Магілёўская вобласць. Пра гэта паведаміў намеснік начальніка інспекцыйна-энергетычнага аддзела Магілёўскага абласнога ўпраўлення па наглядзе за рацыянальным выкарыстаннем ПЭР Дэпартамента па энергаэфектыўнасці Дзмітрый Казакоў.

У нашым рэгіёне размешчана 57 ветраэнергетычных установак магутнасцю 62,58 МВт, пры гэтым больш за 60% ад агульнай колькасці – на аднаўляльнай энергіі (УКЭ). Сумарная выпрацоўка электрычнай энергіі ад іх за 2020 год была роўная 84,116 млн. кВт, а за першы квартал 2021-га – 19,921 млн. кВт, што складае 2,4% ад сумарнага спажывання электрычнай энергіі Магілёўскай вобласцю ў цэлым і 3,8% ад выпрацаванымі ўласнымі энергакрыніцамі.

Самым вялікім на Магілёўшчыне лічыцца ветрапарк з 9 ВЭУ, размешчаны ў вёсцы Пудаўня Дрыбінскага раёна. Яго магутнасць – 9 МВт. А самым высокім ветраком не толькі ў Беларусі, але і на ўсёй прасторы СНД у пачатку мая 2021 года стала новая ветраэнергетычная ўстаноўка паблізу вёскі Асмолавічы Мсціслаўскага раёна. Праект рэалізаваны дзякуючы партнёрству ААТ «Белінвестбанк» і ЗАТ «РЭАГ Магілёў». Месца яе будаўніцтва было выбрана не выпадкова. У дадзеным рэгіёне размешчана зона актыўнага руху паветраных мас. У выніку больш за палову ўсіх ветракоў краіны прыпадае менавіта на гэтую мясцовасць.

Для ўзвядзення найбуйнейшай ветраэнергетычнай устаноўкі была абрана ўзгорыстая мясцовасць з мноствам натуральных узвышшаў, якая не перасякаецца са шляхамі міграцыі пералётных птушак. Крыху больш за паўгода спатрэбілася для рэалізацыі праекта ў Беларусі. Каб зразумець маштаб аб’екта, дастаткова ўявіць 70-павярховы дом. Вышыня ВЭУ складае 142 метры, а магутнасць – 3,4 МВт. Пры гэтым верхняя кропка лопасці дасягае 210 метраў, а размах лопасцяў – 136 метраў.

Ужо сёння выпрацаваная электраэнергія ад новай ВЭУ паступае ў аб’яднаную энергетычную сістэму. Яе галоўнымі спажыўцамі становяцца жылыя дамы і прадпрыемствы найбліжэйшых гарадоў – Крычава, Клімавічаў і Мсціслава. Энергіі, атрыманай за адну гадзіну працы, хапае для таго, каб цэлы месяц забяспечваць электраэнергіяй 10 жылых кватэр або на працягу 4 дзён увесь Мсціслаўскі раён.

«За альтэрнатыўнымі крыніцамі энергіі – наша будучыня, – лічыць дырэктар ЗАТ «РЭАГ Магілёў» Максім Харытон. – Так, у цеплавых і атамнай электрастанцый ёсць перавага, якая заключаецца ў пастаяннай выпрацоўцы электраэнергіі. Аднак, у выпадку сур’ёзнага збою або непаладак на такіх буйных аб’ектах паралізаванай можа аказацца ўся інфраструктура населенага пункта. «Зялёная» энергетыка дазваляе пазбегнуць такога сцэнарыю і становіцца па-сапраўднаму незаменнай. Галоўная перавага ветраўстановак – высокая стабільнасць і мінімальная залежнасць ад сезоннасці або часу сутак. Да таго ж, альтэрнатыўная крыніца энергіі скарачае шкодныя выкіды ў атмасферу планеты.

Рэд.