Рэктар БДУТ: пашырэнне магчымасцяў мэтавай падрыхтоўкі павысіць замацавальнасць кадраў

Пашырэнне магчымасцяў мэтавай падрыхтоўкі павысіць замацавальнасць кадраў. Такім меркаваннем падзяліўся рэктар Беларускага дзяржаўнага ўніверсітэта харчовых і хімічных тэхналогій Максім Кіркор, каментуючы абноўленыя правілы паступлення ў беларускія ВНУ.

«З новаўвядзеннямі ўступнай кампаніі пашырацца магчымасці мэтавай падрыхтоўкі, на што неаднаразова звяртаў увагу наш Прэзідэнт, – адзначыў рэктар. – У гэтым кірунку павінна быць сумесная праца і зацікаўленасць як універсітэта, так і прадпрыемстваў. Вытворчасці, якія глядзяць наперад, разумеюць, што кадравы патэнцыял трэба абнаўляць. Ды і сам абітурыент, паступаючы ва ўніверсітэт па дагаворы мэтавай падрыхтоўкі, атрымае ўпэўненасць у сваёй будучыні. У працэсе навучання гэты студэнт будзе рыхтавацца пад канкрэтнае прадпрыемства і яго патрэбы, праходзіць там усе віды практык, курсавое і дыпломнае праектаванне. На выхадзе малады спецыяліст прыйдзе ўжо ў знаёмую абстаноўку, што скароціць тэрмін яго адаптацыі на першым працоўным месцы».

Акрамя таго, закрываецца пытанне замацоўвання кадраў. Сёння тыя, хто адвучыўся за кошт сродкаў рэспубліканскага бюджэту, павінны адпрацаваць 2 гады. Часта праз гэты час яны сыходзяць з прадпрыемства. Прычын шмат, у тым ліку фінансавыя прыярытэты, сямейна-бытавыя пытанні. Пасля навучання па мэтавым дагаворы тэрмін адпрацоўкі, як правіла, складае 5 гадоў. Ды і само прадпрыемства мае магчымасць прапісаць дадатковыя бонусы маладому спецыялісту. Зацікаўленасць у ім можа выяўляцца ў добрым сацпакеце, адпаведным узроўні зарплаты. У залежнасці ад фінансавага стану прадпрыемства можа выплачваць будучаму супрацоўніку стыпендыю, заахвочваць за высокі бал пры здачы сесіі.

Безумоўны плюс – павелічэнне для ўніверсітэтаў лічбаў прыёму на мэтавую падрыхтоўку, а таксама магчымасць для абітурыента пры наяўнасці адпаведнага дагавора залічвацца па выніках уступных іспытаў ва ўніверсітэце.

«У гэтым годзе будуць праводзіцца ўнутрыўніверсітэцкія алімпіяды па профільных прадметах, пераможцаў якіх будуць залічаць у ВНУ, – растлумачыў Максім Кіркор. – Гэта выдатны бонус, калі вучань ужо ў сакавіку ведае, што стаў студэнтам. Лета ён можа спакойна адпачываць і набірацца сіл. Аднак ніхто яму не забараняе прайсці ЦТ і паспрабаваць паступіць у адну са сталічных ВНУ. Ён нічога не губляе, бо тут ён ужо гарантавана залічаны».

На думку рэктара, з абноўленай сістэмай паступлення ў ВНУ з’яўляецца больш рэзерваў як для самога абітурыента і ўніверсітэта, так і для будучага працадаўцы. «Якасць адукацыі ў беларускіх універсітэтах знаходзіцца на высокім узроўні, пра што сведчыць паток замежных студэнтаў, якія прыязджаюць да нас вучыцца з розных краін, – падкрэсліў рэктар БДУТ. – У нашых жа хлопцаў і дзяўчат ёсць выдатная магчымасць атрымаць якасную адукацыю дома. І ў гэтым я бачу бясспрэчную перавагу мэтавай падрыхтоўкі: дзеці вучацца дома, у сваім рэгіёне: як гаворыцца, дзе нарадзіўся, там і спатрэбіўся. Так, многія мараць жыць і працаваць у сталіцы, але наша краіна – гэта не толькі Мінск, але яшчэ і 6 абласцей. І ўсюды патрэбныя высокакваліфікаваныя кадры, бо ў кожным рэгіёне ёсць прадпрыемствы-флагманы, якім патрабуюцца спецыялісты».

БЕЛТА