Рэпартаж: Галоўны вынік – вучоба на выдатна: у аграгарадку Аўсянка пасля капрамонту адкрыецца сярэдняя школа

Аграгарадок Аўсянка Горацкага раёна з нецярпеннем чакае значнай падзеі: 1 верасня пасля капітальнага рамонту з элементамі мадэрнізацыі тут адкрыецца сярэдняя школа. З лютага па май дзеці займаліся на базе іншых устаноў адукацыі Горацкага раёна і вельмі засумавалі па другім доме. З такімі ж радаснымі пачуццямі чакаюць вяртання на свае звыклыя працоўныя месцы і настаўнікі.

Аўсянкаўская школа зачынілася на рамонт у сакавіку гэтага года. Работы было шмат: у будынку 1982 года пабудовы неабходна было прывесці ў парадак 5 тыс. кв. м. У навучальнай установе цалкам адрамантавалі дах, замянілі электраправодку, вентыляцыю, каналізацыю, устанавілі новыя дзверы і свяцільні, абнавілі сантэхніку, зрабілі падвесныя столі. «Са старога засталіся толькі сцены, ды і тыя з новым дэкаратыўным аздабленнем, – усміхаецца дырэктар установы адукацыі Валянціна Крэміс.

«Прайшло ўсяго некалькі месяцаў з пачатку рамонту, а школу ўжо не пазнаць, – кажа дырэктар. – Здаецца, што нават класы і школьныя калідоры сталі намнога святлейшымі і прасторнейшымі. Цяпер у нас усё новае і сучаснае – ад бытавых памяшканняў да тэхнічнага абсталявання. Нават атмасфера ў школе памянялася: гэта адчуваецца па настроі настаўнікаў і тэхнічных работнікаў. Спадзяёмся, што ў новым навучальным годзе дзеці і бацькі таксама ацэняць нашы старанні. А галоўным вынікам і аддачай стане павышэнне ўзроўню ведаў вучняў».

Першым этапам работ стаў капрамонт школьнага басейна, які завяршыўся ў лістападзе мінулага года. Падчас навучальнага года днём тут займаюцца плаваннем дзеці, а вечарам цэлымі сем’ямі прыязджаюць мясцовыя жыхары – адпачыць і паправіць здароўе. Водныя працэдуры карыстаюцца папулярнасцю нават у жыхароў суседніх раёнаў, і гэта не дзіўна: не ў кожнай сельскай мясцовасці можна знайсці вялікі і сучасны басейн.

Асобная ўвага нададзена спартыўнай зале, у якой выкладзена новае гамагеннае пакрыццё, адрамантаваны распранальні і ўстаноўлены сучасныя душавыя. Жадаючыя змогуць наведаць трэнажорную залу, дзе таксама зрабілі неабходныя рамонтныя работы. «Абнаўленне спартыўнай матэрыяльна-тэхнічнай базы спрыяльна адаб’ецца і на здароўі нашых дзяцей: спадзяёмся, што яны стануць больш рухацца і актыўна праводзіць час», – упэўнена дырэктарка.

У Аўсянкаўскай сярэдняй школе цалкам уладкавалі кабінеты хіміі і фізікі. Новае абсталяванне для лабараторных заняткаў па фізіцы закуплена дзякуючы сродкам Міжнароднага банка рэканструкцыі і развіцця, а вось кабінет хіміі абнавілі за кошт сродкаў мясцовага бюджэту. Рамонт зроблены і ў агракласе. З метадычнымі матэрыяламі і абсталяваннем дапамагла Беларуская дзяржаўная сельгасакадэмія: дзякуючы ВНУ ў агракласе з’явіліся наглядныя дапаможнікі і вялікі чатырохметровы стэнд. Тут праходзяць профільныя заняткі для старшакласнікаў раёна па спецыяльнасцях «трактарыст-машыніст» і «вадзіцель колавых і самаходных машын катэгорыі А».

«Прафесію трактарыста-машыніста атрымліваюць у нашай школе яшчэ з савецкіх часоў, з 1983 года, – расказаў настаўнік працоўнага навучання Сяргей Дземянкоў. – Вучыцца прыходзяць як хлопцы, так і дзяўчаты. Заняткі на базе школы бясплатныя – бацькі кампенсуюць толькі кошт дызпаліва. У тыдзень на прафесійнае навучанне адведзена 6 гадзін. Акрамя гэтага, каб атрымаць пасведчанне кіроўцы, трэба наездзіць 16 гадзін на вучэбным трактары і яшчэ 120 гадзін адвесці вытворчай практыцы. Затое пасля заканчэння школы ўжо ёсць прафесія – можна адразу ісці працаваць. Атрымліваецца эканомія часу і сродкаў. Напрыклад, калі вучыцца на кіроўцу трактара ў спецыяльнай навучальнай установе, на гэта пойдзе больш за 3,5 гады».

З гэтага года ў школе з’явіцца і настаўнік па грамадзянска-патрыятычным выхаванні. Аляксандр Петрусенка будзе тлумачыць падлеткам аспекты грамадзянска-прававой культуры, звяртаць увагу на інтэрнэт-бяспеку, а таксама расказваць аб прэстыжнасці ваеннай службы. «У савецкі час служба ў арміі была ганаровым і свяшчэнным абавязкам кожнага мужчыны, – кажа ён. – На жаль, у нашы дні большасць хлопцаў прытрымліваецца іншага меркавання, і гэта не можа не турбаваць. Мая задача – правесці прафарыентацыю сярод моладзі і пры неабходнасці падрыхтаваць да паступлення ў спецыялізаваныя ВНУ: Магілёўскі інстытут МУС, Ваенную акадэмію і Акадэмію МУС».

У астатнім вучэбна-адукацыйны працэс будзе праходзіць у звыклым для ўсіх рэчышчы. У арганізацыйным плане ў школе працягнецца кантроль санітарна-эпідэміялагічных нормаў, абумоўлены пандэміяй COVID-19. Для бяспекі дзяцей і супрацоўнікаў будзе арганізаваны масачны рэжым, тэмпературны кантроль і шэраг іншых мерапрыемстваў. Акрамя таго, у школьнай сталовай кожны прыём ежы – сняданак, абед і вячэра – будзе праходзіць у два этапы. Гэта зроблена для таго, каб дыстанцыяваць дзяцей адзін ад аднаго.

Па словах Валянціны Крэміс, цяпер у школе ідзе апошняя падрыхтоўка перад Днём ведаў – расстаўляецца мэбля і абсталяванне, раскладваюцца навучальныя дапаможнікі, развешваюцца стэнды. За тыдзень усё будзе на сваіх месцах у чаканні вучняў. 1 верасня за парты ўстановы адукацыі сядзе 100 дзяцей, сярод якіх 9 першакласнікаў. На жаль, школа, разлічаная на 360 месцаў, запоўненая толькі на трэць. І гэта пры ўмове, што тут навучаюцца дзеці з шасці найбліжэйшых населеных пунктаў. Дырэктар спадзяецца, што калі-небудзь сітуацыя зменіцца.

«У сельскай мясцовасці створаны ўсе неабходныя ўмовы для нашых дзяцей, таму баліць душа, калі сем’і з’язджаюць адсюль у абласныя і раённыя цэнтры, – кажа Валянціна Крэміс. – Толькі за апошнія чатыры гады ў сувязі з пераездам у іншую мясцовасць са школы забралі дакументы больш за 30 чалавек. А ў нашым аграгарадку выдатная інфраструктура: ёсць свая паліклініка, участковая бальніца, пошта, філіял банка, магазіны і нават басейн. У класах у сярэднім займаецца 8–10 чалавек – практычна індывідуальнае навучанне або рэпетытарства, калі ў горадзе ўсе навучальныя ўстановы перапоўненыя. Плюс да ўсяго ёсць магчымасць развіваць дзіця дадаткова: мы прапануем заняткі ў гуртках па саломапляценні, маляванні, кераміцы і нават вакале. А цяпер, з уводам пасля капрамонту нашай школы, лепшыя ўмовы навучання для дзяцей і ўявіць складана».

З такімі словамі згодная маці Наталля Жарыкава, у якой чацвёра дзяцей – выхаванцы Аўсянкаўскай школы. Старэйшая дачка ўжо некалькі гадоў як скончыла ўстанову, двое сярэдніх працягваюць тут вучыцца, а самая малодшая, 6-гадовая Ірына, пойдзе ў першы клас. «Дочкі дакладна не пазнаюць нашу школу, калі прыйдуць сюды 1 верасня, – захоплена кажа Наталля Жарыкава. – Памянялася ўсё: і знешні выгляд будынка, і прылеглая тэрыторыя, і навучальныя кабінеты. Гэта выдатна, што для нашых дзяцей зрабілі такі выдатны рамонт, – дзякуй усім, хто над гэтым працаваў. Школа нам вельмі падабаецца і па матэрыяльна-тэхнічнай базе, і па педагагічным калектыве. Усе добрыя, лагодныя, ставяцца да дзяцей з вялікім разуменнем, павагай і ўвагай».

З нецярпеннем чакае сваіх вучняў і настаўнік пачатковых класаў Жанна Судзейная. У кабінеце яе 4-га класа ўжо ўсё на сваіх месцах – чысціня і поўны парадак. Засталася справа за малым: падрыхтаваць першы ўрок, які будзе прысвечаны Году народнага адзінства. «Наша задача – навучыць дзяцей не толькі чытаць і пісаць, але і мець зносіны, сябраваць, ведаць гісторыю Беларусі, любіць і паважаць сваю Радзіму, – адзначае настаўнік. – Як дарослы чалавек з пэўным жыццёвым вопытам, я гэта вельмі добра разумею. А малым усё трэба растлумачыць і беражліва ўкласці ў іх сэрцы. Хочацца, каб яны памяталі тое месца, дзе нарадзіліся і выраслі, а таксама шанавалі ўсё, што для іх робіцца. Бо абноўленая прыгожая і ўтульная школа – таксама значны ўклад з боку дзяржавы ў іх сучаснасць і светлую будучыню».

БЕЛТА