Рэспубліканскі семінар-нарада, прысвечаны пытанням рамонту сельгастэхнікі, прайшоў у Магілёве

Рэспубліканскі семінар-нарада, прысвечаны пытанням рамонту сельскагаспадарчай тэхнікі, падрыхтоўцы яе да палявых работ у новым сезоне, прайшоў у Магілёве. У ім прынялі ўдзел прадстаўнікі Міністэрства сельскай гаспадаркі і харчавання, Міністэрства прамысловасці, камітэтаў па сельскай гаспадарцы і харчаванні аблвыканкамаў, РА «Белаграсэрвіс», заводаў-вытворцаў, рамонтных прадпрыемстваў.

На базе ААТ «Задняпроўскі міжрайаграсэрвіс» з мэтай абмену вопытам адбылася вучоба па арганізацыі рамонту энерганасычаных трактароў, рухавікоў, кормаўборачнай і збожжаўборачнай тэхнікі, работ па правядзенні тэхнічнага абслугоўвання тэхнікі ў гарантыйны і паслягарантыйны перыяд, аднаўленні вузлоў і дэталяў паліўнай і гідраўлічнай апаратуры, абкаткі рухавікоў, водпуску запасных частак. Акрамя таго, удзельнікі мерапрыемства азнаёміліся з матэрыяльна-тэхнічнай базай прадпрыемства.

«Падобны семінар – гэта нейкае прамежкавае мерапрыемства, якое кантралюе ход своечасовай падрыхтоўкі тэхнікі да новай пасяўной, нарыхтоўчай, уборачнай кампаніі і іншых відаў сельскагаспадарчых работ, – падзяліўся меркаваннем Станіслаў Карповіч, начальнік галоўнага ўпраўлення тэхнічнага прагрэсу і энергетыкі, дзяржаўнага нагляду за тэхнічным станам машын і абсталявання Міністэрства сельскай гаспадаркі і харчавання Рэспублікі Беларусь. – У аграпрамысловым комплексе працуе больш за 222 тыс. сельскагаспадарчых машын і абсталявання. Гэта велізарны комплекс, які патрабуе адпаведнай падрыхтоўкі і абслугоўвання. І ёсць машыны, складаныя па сваёй канструкцыі і іншых параметрах, якія не могуць быць адрамантаваныя на базе сваіх сельгасарганізацый, таму пастаўляюцца на спецыялізаваныя пункты – іх у Беларусі больш за 60. У іх ліку – ААТ «Задняпроўскі міжрайаграсэрвіс», на базе якога сёлета праводзіцца рэспубліканскі семінар.

Кожнай з гэтых арганізацый даведзены заданні, вызначаны метады і сродкі ўздзеяння на тыя ці іншыя машыны і абсталяванне, якія дазволяць аднавіць да ўзроўню не ніжэй за 90% рэсурсу з мінімальнымі выдаткамі. Названыя рамонтныя прадпрыемствы маюць абсталяванне, кадры, патэнцыял, тым самым дапамагаючы аграпрамысловаму комплексу адрамантаваць і падрыхтаваць сельскагаспадарчую тэхніку да палявых работ.

Варта адзначыць, што ў ААТ «Задняпроўскі міжрайаграсэрвіс» такая праца арганізавана на належным узроўні, што дазваляе канстатаваць факт, што тэхніка будзе своечасова падрыхтавана да новага сезона».

Пленарная частка нарады адбылася ў ААТ «Кіруючая кампанія холдынгу “Аграмашсэрвіс”». Былі заслуханы даклады аб пастаноўцы тэхнікі на захоўванне, пастаўцы рамфонда і арганізацыі падрыхтоўкі машынна-трактарнага парку, справаздачы камітэтаў па сельскай гаспадарцы і харчаванні аблвыканкамаў, рамонтных прадпрыемстваў, прадстаўнікоў Міністэрства прамысловасці і заводаў-вытворцаў.

«Два гады таму кіраўнік дзяржавы, пабываўшы ў Гродзенскай вобласці, даручыў усім абласцям арганізаваць рамонт сельскагаспадарчай тэхнікі, якая ўдзельнічае ў вясновых палявых работах, нарыхтоўцы кармоў, уборцы ўраджаю, збожжавых культур, і па гэтым напрамку ўжо праведзена вялікая праца, – адзначыў першы намеснік старшыні Магілёўскага аблвыканкама Анатоль Уласевіч. – Вядзецца не толькі рамонт сельскагаспадарчай тэхнікі, але і аднаўленне той, якая ўжо адслужыла свой тэрмін.

Наш ААТ «Задняпроўскі міжрайаграсэрвіс» сёння забяспечвае сельскагаспадарчыя арганізацыі і прадпрыемствы запаснымі часткамі. Не заўсёды ў гаспадарках маюцца адпаведныя спецыялісты, здольныя адрамантаваць сучасныя паліўную апаратуру, складаныя рухавікі. Тое ж самае тычыцца трактароў, тэхнікі, збожжаўборачных камбайнаў, сянажных комплексаў, насычаных сучаснай камп’ютарнай электронікай. Для іх рамонту неабходныя «электроншчыкі», і мы сёння маем участак па рамонце электраабсталявання, спецыяльна падрыхтавалі для гэтай працы спецыялістаў.

Акрамя гэтага, вывучана патрэба ў тэхніцы, якая будзе ўдзельнічаць у вяснова-палявых работах, – гэта энерганасычаныя трактары BELARUS-3032, BELARUS-3522. Сельгаспрадпрыемствам вобласці неабходна 105 такіх адзінак тэхнікі. І за 3,5 месяцы мы павінны іх адрамантаваць. За перыяд, адведзены на гэта ў 2021 годзе, мы вярнулі ў строй каля 70 адзінак гэтай тэхнікі. Наступным этапам будзе рамонт корманарыхтоўчай і зернеўборачнай тэхнікі.

Стаіць таксама задача папоўніць арсенал наяўнага абменнага фонду рухавікоў, каробак перамены перадач, трансмісіі, гідраўлічнай і паліўнай апаратуры. Каб падчас пасяўной усе паломкі ўхіляліся ў кароткі тэрмін.

«Арганізавана аднаўленне тэхнікі другаснага рынку, каб даць новае жыццё той ці іншай адзінцы тэхнікі, – падкрэсліў Анатоль Уласевіч. – У нас ужо ёсць такі вопыт. Напрыклад, адноўлены трактар BELARUS-1221 нашага МТЗ, які па тэхнічным стане быццам толькі сышоў з канвеера, варты сёння Br51 тыс, тады як новы абыдзецца ў суму больш як Br150 тыс. Гэта праца працягнецца.

Праведзеная нядаўна селектарная нарада пад кіраўніцтвам Савета Міністраў Рэспублікі Беларусь на чале з прэм’ер-міністрам Раманам Галоўчанкам вызначыла прыярытэты, і будзе аказана дапамога з боку рэспубліканскіх органаў і аблвыканкама. Для правядзення рамонтных работ на перыяд пасяўной 2021 года, перыяд нарыхтоўкі кармоў і ўборкі збожжавых культур толькі Магаблвыканкамам выдзелена больш за Br10 млн. У снежні было вызначана, што са сродкаў рэспубліканскага бюджэту роўнымі долямі кожнай вобласці будзе выдзелена прыкладна Br13–15 млн. у дадатак да абласнога бюджэту, і гэта накладзе станоўчы адбітак на рамонце і падрыхтоўцы тэхнікі да веснавой пасяўной».

У мэтах забеспячэння своечасовага і якаснага рамонту самаходнай, прычапной і навясной сельскагаспадарчай тэхнікі ў сельгасарганізацыях рэгіёна распрацаваны абласны план.

Да сезонных палявых работ 2022 года неабходна падрыхтаваць 8,2 тыс. адзінак сельскагаспадарчай тэхнікі (44% да наяўнасці на 1 лістапада 2021), у тым ліку 1534 трактары (34%), 793 збожжаўборачных (67%) і 353 кормаўборачных камбайнаў (63%).

Вызначаны аб’ёмы фінансавання падрыхтоўкі відаў сельгастэхнікі ў 2022 годзе ў аб’ёме Br 67,2 млн.

У мэтах забеспячэння рамонту поўнакамплектнай тэхнікі, вузлоў і агрэгатаў, якасны рамонт якіх ва ўмовах рамонтных майстэрняў сельгасарганізацый немагчымы, вызначаны рамонтныя прадпрыемствы аграсэрвісу ААТ «Задняпроўскі міжрайаграсэрвіс», ААТ «Кіраўскі райаграпрамтэхзаб», ААТ «Касцюковіцкі райаграпрамтэхэнерга», ААТ «Круглянскі аграпрамтэхзаб», якія валодаюць неабходным дыягнастычным і тэхналагічным абсталяваннем.

Згодна з зацверджаным у аблвыканкаме пералікам, на спецыялізаваных рамонтных прадпрыемствах запланавана адрамантаваць 105 энерганасычаных трактароў, 24 пагрузчыкі, 5 збожжаўборачных і 3 кормаўборачныя камбайны, 59 рухавікоў і вузлоў да энерганасычаных трактароў на агульную суму больш за Br15 млн.

Распрацаваны і даведзены прадпрыемствам ААТ «Кіруючая кампанія холдынгу “Аграмашсэрвіс”» план вытворчасці на 2022 год – 27,2 тыс. адзінак запасных частак да сельскагаспадарчай тэхнікі айчыннай і імпартнай вытворчасці.

Юлія Таранава, фота Галіны Гаўрыловіч.