Сяўбу азімых у Магілёўскай вобласці плануецца завяршыць да 8 кастрычніка

Сяўба азімых культур была пастаўлена на паўзу зацяжнымі дажджамі верасня. Як толькі ўсталявалася надвор’е, тэхніка зноў выйшла ў поле. Дзесьці сяўба ідзе са світання да заходу. А ў іншых гаспадарках перайшлі зусім на кругласутачны рэжым. І гэта ў восеньскі дзень, які «год корміць», самая верная тактыка.

На ўчарашні дзень на Магілёўшчыне насенне азімых легла ў зямлю на 81% запланаваных плошчаў. Засталося пасеяць 44,2 тысячы гектараў. Калі ўмовы надвор’я будуць спрыяць, то трох дзён аграрыям вобласці хопіць для завяршэння страды.

Пасеяць азімыя ў максімальна кароткія тэрміны – такую задачу ставяць перад сабой аграрыі па ўсёй краіне. Ва ўсіх раёнах на азімую сяўбу мабілізаваны ўсе неабходныя рэсурсы: і тэхніка, і людзі.

Стаўку на азімыя на Магілёўшчыне зрабілі яшчэ летась. З тых часоў у структуры збожжавых 60 працэнтаў займаюць азімыя і 40 – яравыя. Усяго ж пад азімыя культуры ў краіне адведзена амаль паўтара мільёна гектараў.

– Як паказала практыка, – удакладняе першы намеснік старшыні аблвыканкама Анатоль Уласевіч, – ураджайнасць азімых вышэйшая за ўраджайнасць яравых на 5–8 цэнтнераў з гектара. Таму ў апошнія два гады мы пайшлі на павелічэнне пасяўных плошчаў азімага кліну.

У лідарах па сяўбе кіраўскія аграрыі – пасеяна 109% плошчаў. 92% палёў засеяна азімымі ў Горацкім, па 90% – Бабруйскім, Краснапольскім, Круглянскім, Магілёўскім і Асіповіцкім раёнах. Сярод адстаючых – Чавускі раён (58 працэнтаў да плана).

Не адстае ў выкананні пастаўленых задач Шклоўскі раён, 93% тэрыторыі якога ўжо засеяна азімымі збожжавымі. Старшыня Шклоўскага раённага выканаўчага камітэта Андрэй Камко прааналізаваў ход пасяўной у раёне:

– Сапраўды, апошнія 10 дзён надвор’е было не на нашым баку – лілі дажджы, таму тэмпы пасяўной былі істотна зніжаныя. Мы, вядома ж, усё роўна выходзілі ў поле: там, дзе зямельныя ўчасткі дазваляюць, вялі ўсе неабходныя працы: аралі, рыхтавалі зямлю, пускалі сеялкі. Разумеем, гэта былі не тыя аб’ёмы, якія неабходныя. Зараз тэхніка масава выйшла ў палі, ворыва і падрыхтоўка зямлі вядзецца кругласутачна. Аднак гэта вельмі ювелірная праца: для таго каб сеяць у цёмны час сутак, за рулём павінен сядзець вельмі дасведчаны механізатар, таму што ёсць рызыка па неасцярожнасці сапсаваць тэхніку. Асноўная маса работнікаў, задзейнічаных на сяўбе азімых, працуе з самай раніцы і да позняга вечара – з 6.00 да 22.00.

Выйсці на ўзровень мінулага года – мінімальная задача шклоўскіх аграрыяў. Для завяршэння азімай сяўбы ў тэрмін у Шклоўскім раёне задзейнічаны ўсе рэсурсы. Даведзенае заданне па ворыве выканана ў поўным аб’ёме.

– Людзі настроеныя на тое, каб скончыць сяўбу аператыўна, ва ўстаноўленыя тэрміны, – дапаўняе Андрэй Камко. – Усе разумеюць, што менавіта цяпер закладваецца ўраджай новага года, і не абураюцца, што даводзіцца працаваць на прадлёнцы або ў начную змену. Настрой у людзей прадуктыўны. Тым больш што задзейнічаным на пасяўной кіраўнікі гаспадарак даюць дадатковыя бонусы ў выглядзе прэмій. Дзякуючы суладнай працы сёння ўзяты добрыя тэмпы, якія дазволяць раёну выканаць пастаўленыя задачы. Нам застаецца толькі адно – добрасумленна і якасна выконваць сваю працу, што мы сёння і робім.

Такі ж настрой і ў іншых раёнах. Аграрыі Магілёўскага раёна актыўна закладваюць ураджай будучага года. На палях ва ўсіх гаспадарках працуе пасяўная тэхніка. Плошчы, засеяныя азімымі культурамі, павялічваюцца на вачах. Аб’ём работ вялікі, таму тэмп працаўнікамі палёў узяты самы высокі.

Як расказаў першы намеснік начальніка ўпраўлення па сельскай гаспадарцы і харчаванні Магілёўскага райвыканкама Генадзь Давыдаў, на раніцу 5 кастрычніка азімыя збожжавыя культуры пасеяны ў раёне на 20621 гектары, што складае 90 працэнтаў ад плана. Азімай пшаніцай засеяна больш за 11 тысяч гектараў, трыцікале – 7,7 тыс. гектараў, 1,5 гектараў займае азімае жыта. Акрамя таго, на 332 гектарах пасеяны азімы ячмень.

– У азімых пэўны перыяд восеньскай вегетацыі пры такім кароткім светлавым дні, – тлумачыць Генадзь Давыдаў. – Да зімы яны павінны раскусціцца і набраць цукар. Калі не атрымаюць яго, папросту не перазімуе: клетка разарвецца ад марозу. Гэта фізіка. Вось чаму тэрміны для сяўбы ўстанаўліваюцца ў залежнасці ад развіцця раслін, іх фаз. Навукоўцы кажуць, што часам адведзены перыяд для сяўбы можна пратэрмінаваць. Так, дапушчальна, але ў хатніх гаспадарках. Калі ж гаворым пра аб’ёмы і маштабы сельгаспрадпрыемстваў, рызыкаваць не маем права.

У кожнага сельгаспрадпрыемства свая тактыка: адны выводзяць больш тэхнікі, другія працуюць пазменна, у тым ліку ў начны час.

– Калі надвор’е стала дазваляць, выводзілі ноччу 3–4 агрэгаты, цяпер паступова дадаём, – адзначае Генадзь Анатольевіч. – Усё залежыць ад канкрэтнага поля, не ўсюды можна адправіць трактар. Знаходзім месцы, дзе роўныя палі і ёсць гарантыя, што тэхніка не затрымаецца. Нізіны яшчэ сырыя, не заўсёды можна зайсці і днём. У астатнім усё ідзе ў звыклым рэжыме. У структуры пасяўных плошчаў змены толькі ў тым, што сталі спрабаваць новую для сябе культуру – азімы ячмень. Пакуль эксперыментальна плануем пасеяць 332 гектары.

Як толькі ў гаспадарках-перадавіках з’явяцца свабодныя рукі, перакінуць тэхніку на дапамогу адсталым. Пакуль у Магілёўскім раёне першымі ідуць ААТ «Цішоўка», філіял «Вендараж» РУП «Магілёў-энерга», ПТУП «Птушкафабрыка «Ялец». Астатнія падцягваюцца.

Механізатар Дзяніс Якімовіч з СДП «Авангард» РУП «Магілёўскае аддзяленне Беларускай чыгункі» Магілёўскага раёна падзяліўся хронікай азімай сяўбы:

– Пробна выйшлі ў поле яшчэ 6 верасня. Толькі набраў тэмп, як з 17 верасня пайшлі дажджы, праца застапарылася. Зараз мы ў рэжыме нон-стоп наганяем упушчанае. Два энерганасычаныя трактары «Беларус-3522» з сеялкамі ў полі з шасці раніцы і да позняга вечара.

У гэту пасяўную Дзяніс атрымаў новы энерганасычаны трактар.

– Працуем з напарнікам Васілём Максімавым, што называецца, у дзве рукі. Стараемся па максімуму выкарыстоўваць дзённы час, ноччу бачнасць дрэнная. Здаецца, на першы погляд поле нармальнае, але там не падсохла. Якая тут тэхналогія? Тэмп узялі добры, а інакш і нельга – тэрміны падціскаюць. Калі гон доўгі, у дзень можна і да 50 гектараў засеяць. Перад тым як выйсці ў поле пасля перапынку, з галоўным аграномам паглядзелі, якія ўчасткі можна адпрацоўваць.

Усяго ў СДП «Авангард» трэба засеяць 2000 гектараў збожжавых: тысячу гектараў – пшаніцай і столькі ж – трыцікале.

Диана Гаранинова, zilmogilev.by