У Магілёве ўзнагародзілі ўдзельнікаў патрыятычнай акцыі па стварэнні макетаў медалёў перыяду Вялікай Айчыннай вайны

Падвядзенне вынікаў абласной патрыятычнай акцыі па стварэнню макетаў медалёў перыяду Вялікай Айчыннай вайны і ўзнагароджанне пераможцаў адбылося сёння ў Магілёўскім абласным мастацкім музеі імя П.У. Масленікава. Ва ўрачыстай цырымоніі прынялі ўдзел старшыня абласной ветэранскай арганізацыі Анатоль Глаз, начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка, намеснік начальніка галоўнага ўпраўлення па адукацыі Магілёўскага аблвыканкама Ірына Кускова, старшыня праўлення Магілёўскага абласнога аддзялення Беларускага фонду міру Андрэй Нікіцін.

Патрыятычная акцыя, ініцыяваная абласной радай ветэранаў, праводзілася сярод навучэнцаў школ, устаноў прафесійна-тэхнічнай і сярэдняй спецыяльнай адукацыі рэгіёну напярэдадні святкавання 80-годдзя вызвалення Беларусі ад нямецка-фашысцкіх захопнікаў. На працягу месяца экспазіцыя гатовых конкурсных работ размяшчалася ў музеі імя П.У. Масленікава і была адкрыта для наведвання, у тым ліку, экскурсіі былі арганізаваны для дзяцей з летніх аздараўленчых лагераў. Зараз жа работы раз'едуцца па раёнах і гарадах, будуць выстаўлены ў раённых краязнаўчых музеях, потым папоўняць музеі і пакоі баявой і працоўнай славы навучальных устаноў.

Як зазначыў старшыня аргкамітэта акцыі, намеснік старшыні абласнога Савета ветэранаў Валерый Яленскі, ветэранская арганізацыя пастаянна шукае новыя формы захавання памяці аб Вялікай Айчыннай вайне, яе абаронцах: «Патрыятычная акцыя была аб'яўлена, каб рабяты маглі вывучыць не толькі подзвігі нашых абаронцаў, нашай краіны, таксама ўзнагароды, якімі адзначалі герояў вайны. Таму што за кожнай з іх - адвага, асабістая мужнасць. Думаю, у кожнай сям'і ёсць дзядулі, прадзеду, бабулі, бацькі і іншыя сваякі, якія мелі такія ўзнагароды.

Мы зыходзілі з таго, што рабяты зоймуцца пазнавальнай дзейнасцю. І будуць уцягнуты не толькі ў выраб муляжоў, але і ў вывучэнне гісторыі воінскіх узнагарод: хто і за якія подзвігі імі ўзнагароджваўся, колькі ўсяго было ўзнагароджаных.

Вядома, у працэсе працы да вывучэння гісторыі ўзнагарод падключаліся бацькі, бабулі і дзядулі, былі расказаны сямейныя гісторыі. Мы лічым, што патрыятычная скіраванасць праекта атрымала станоўчы водгук і дазволіла задумацца кожнаму - многія ўзнагароды былі прысвоены пасмяротна. Людзі ішлі абараняць радзіму, не думаючы аб узнагародах.

Сёння мы падводзім вынікі першага этапа конкурсу - па стварэнні макетаў 27-мі медалёў перыяду Вялікай Айчыннай вайны да 80-годдзя вызвалення Беларусі ад нямецка-фашысцкіх захопнікаў. Другі этап па вырабе макетаў 25 ордэнаў будзе рэалізаваны да 80-годдзя Перамогі».

Дыпломам першай ступені на конкурсе быў адзначаны Бабруйскі дзяржаўны аграрна-эканамічны каледж. Настаўнік працоўнага навучання ўстановы адукацыі Жана Папіша расказала пра тое, як з навучэнцамі сваёй групы Станіславам Кліменкам, Алінай Леўчанкай і Анастасіяй Шпырковай яны працавалі над стварэннем макетаў: «Штангенцыркулем здымалі памеры з арыгінальных медалёў. Затым стваралі з палімернай гліны муляжы, уручную выразалі калодкі і распісвалі стужкі. Максімальна набліжана да рэальнасці выраблялі нават мацаванні. Праведзена і вялікая падрыхтоўчая работа. У працэсе збору інфармацыі даведаліся некаторыя цікавыя факты аб узнагародах.

Аб тым, каб выбіцца ў лідары нават не задумваліся - проста акунуліся ва ўвасабленне праекта з галавой. Хоць з рабятамі мы ўдзельнічаем у розных конкурсах, гэты захапіў усе думкі: даведаешся адзін факт і хочацца падрабязней пагрузіцца ў яго гісторыю. Нават зараз, калі праца над праектам ужо скончана.

Для сучасных дзяцей Вялікая Айчынная вайна гучыць зусім не так, як для нашага пакалення, якое вырасла на гісторыях з першых вуснаў ад ветэранаў вайны, малалетніх вязняў. І каб рабяты прасякнуліся гісторыяй, адчулі гонар за гераічны подзвіг сваіх продкаў і патрэбны такія праекты, якія развіваюць у іх патрыятызм. Гэта вывучэнне гісторыі свайго народа, сваёй краіны, а таксама даследчая дзейнасць, творчая, карысны вольны час. Такая дзейнасць не пакідае абыякавых».

Таксама першае месца атрымалі за сваю працу навучэнцы Вендарожскай сярэдняй школы імя Раманькова Магілёўскага раёна. Настаўнік хіміі і біялогіі, кіраўнік па патрыятычным выхаванні Андрэй Турэмскі сам займаецца пошукавай працай і захапляе гэтым хлопцаў: «Я знаходжуся ў абласным гісторыка-патрыятычным клубе «Вікру». Акрамя таго, у школе ў нас вялікая праграма па патрыятычным выхаванні. З 2021 года ў нас дзейнічае свая пошукавая група «Аўрора», у якой задзейнічаны дзеці 14-16 гадоў. Рыхтуем і меншых дзяцей наперад, прывіваем цікавасць да гісторыі сваёй малой радзімы, сваёй краіны. І хачу сказаць, што рабяты праявілі сябе вельмі актыўна: у гэтым праекце педагогі былі проста кіраўнікамі – падказвалі, накіроўвалі, таксама ў нечым падключаліся, садзейнічалі бацькі. У астатнім жа, не менш як на 90% хлопцы справіліся самі: вывучалі інфармацыю, падбіралі матэрыялы, стваралі макеты. Больш за тое, шмат каго падштурхнула пацікавіцца ў бацькоў, што яны ведаюць пра лёс дзядоў і прадзедаў. Само гэтае жаданне - ведаць гісторыю сваёй сям'і - ужо важнае і каштоўнае».

Намеснік дырэктара школы Святлана Савельева дапоўніла: «З кастрычніка 2022 года нашай школе было прысвоена імя героя Героя Савецкага Саюза Міхаіла Ягоравіча Раманькова. І ўсё пачалося якраз з удзелу нашых рабят у праекце абласной ветэранскай арганізацыі па стварэнні макетаў спаленых вёсак. На праекце іх макет, прысвечаны кургану ў вёсцы Дубінка, заняў другое месца. Але вывучэнне гісторыі на гэтым не спынілася. З настаўнікам гісторыі дзеці ўсё больш чыталі пра гэты населены пункт і знайшлі інфармацыю, што быў такі дастойны ўраджэнец гэтай вёскі, які ў 18 гадоў атрымаў такое высокае званне. І тады было прынятае рашэнне ўвекавечыць яго памяць, знайсці сваякоў, сабраць усе дакументы, каб школе было прысвоена імя. На адкрыццё памятнай дошкі прыехалі два сыны і дачка героя. Гэта кранае да глыбіні душы.

Мой дзядуля таксама ваяваў і я аддала ўсе яго ўзнагароды ў нашу музейную экспазіцыю. Дзеці на свае вочы бачаць іх. У падрыхтоўцы да цяперашняга праекта дапамагла і гэтая магчымасць узяць у рукі сапраўдныя медалі, і кніга «Ордэны і медалі Савецкага Саюза». Магу сказаць, што адна з гісторый асабліва ўскалыхнула нашых дзяцей. Калі яны прачыталі, што медалём «За адвагу» быў узнагароджаны шасцігадовы хлопчык, сын палка, многія задумаліся, прымералі гэтую гісторыю на сябе - ці змаглі б яны так паступіць. Калі чытаеш гісторыі канкрэтных подзвігаў - гэта ўспрымаецца зусім інакш. У гэтым і заключаецца каштоўнасць такіх акцый і праектаў».

Як адзначыла Кацярына Музычэнка: «Такія акцыі - пра наш патрыятызм, пра нашых дзяцей, пра нашу будучыню. Такім чынам нам і трэба вывучаць гісторыю Вялікай Айчыннай вайны, не дапушчаючы яе перапісванні, не дапушчаючы адраджэнні фашызму. Вы бачыце, што адбываецца вакол нашых межаў, што адбываецца ў свеце. І таму мы, беларусы, павінны быць на варце міру, павінны стаяць усёй нашай краінай нязломнай крэпасцю, павінны памятаць кожную з узнагарод.

Менавіта такія акцыі выхоўваюць сапраўдных патрыётаў нашай краіны».

Ірына Кускова ад імя галоўнага ўпраўлення па адукацыі аблвыканкама падзякавала ветэранскай арганізацыі за ініцыятыву: «Дзякуючы гэтаму рабяты яшчэ раз змаглі дакрануцца да таго вялікага мінулага, подзвігаў герояў Перамогі, якія стварылі яго. Рабяты не проста вырабілі рукамі муляжы ўзнагарод, яны перавярнулі вялікую колькасць гістарычных матэрыялаў, шмат даведаліся. Усё гэта застаецца ў памяці, у душах і сэрцах дзяцей. Гэта самае галоўнае. Тое, што дазваляе захаваць памяць аб гераізме нашага народа ў Вялікай Айчыннай вайне, ніколі не забыцца і самае галоўнае, ніколі больш не дапусціць паўтарэння такіх страшных падзей».

У сваю чаргу Андрэй Нікіцін падкрэсліў: «Наша галоўная мэта - гэта мір. Як у Беларусі, так і ва ўсіх астатніх краінах. І каб гэта было магчыма, нашыя дзеці павінны жыць з чыстым, прыгожым, памятаючым і ўдзячным сэрцам. І падобныя акцыі, як мне падаецца, спрыяюць дасягненню гэтай мэты».

Падчас урачыстай цырымоніі дыпломамі другой ступені таксама былі адзначаны работы хлопчыкаў і дзяўчынак з Дзіцячай школы мастацтваў горада Крычава, Цялушскай сярэдняй школы і Цэнтра творчасці Бабруйскага раёна. Трэцяе месца занялі макеты творчых груп Раённага цэнтра творчасці дзяцей і моладзі «Ветразь надзей» Хоцімска, Глускай сярэдняй школы №2 імя І.І.Захаранкі, Магілёўскага дзяржаўнага эканамічнага прамыслова-тэхналагічнага каледжа. Спецыяльны дыплом атрымала аддзяленне сацыяльнай рэабілітацыі, абілітацыі інвалідаў установы ТЦСАН Ленінскага раёна Бабруйска.

Завяршаючы цырымонію, Анатоль Глаз яшчэ раз падкрэсліў, што гэта толькі першы этап патрыятычнай акцыі, якая была намечана абласной радай ветэранаў: «Наступны яе этап – гэта выраб макетаў ордэнаў ВАВ, да 80-годдзя Перамогі. Удзельнікамі таксама стануць навучэнцы школ, устаноў прафесійна-тэхнічнай і сярэдняй спецыяльнай адукацыі. Арганізатарамі зноў выступяць абласны савет ветэранаў, упраўленні адукацыі і культуры, БРСМ і, вядома, абласное аддзяленне Беларускага фонду міру, якое забяспечвае фінансаванне праекту.

Водгукі на гэтую акцыю мы атрымалі самыя станоўчыя. Перш за ўсё таму, што яна накіравана на захаванне памяці аб абаронцах нашай Айчыны, нашай слаўнай гісторыі. І гэта вельмі адгукаецца людзям».

Юлія Таранава, фота Галіны Гаўрыловіч