Вольга Петрашова: урокі памяці дапамагаюць захаваць гісторыю краіны і кожнай асобнай сям’і

Урокі памяці ва ўстановах адукацыі дапамагаюць захаваць не толькі дакладную гісторыю нашай краіны ў гады Вялікай Айчыннай вайны, але і гісторыю кожнай асобнай сям’і. Такім меркаваннем падзялілася намеснік старшыні Пастаяннай камісіі па міжнародных справах Палаты прадстаўнікоў Вольга Петрашова падчас тэматычнага ўрока ў сярэдняй школе № 37 Магілёва.

«Вельмі важна, што нашы ўрокі памяці праходзяць напярэдадні важнага і значнага для кожнага беларуса свята – Дня Перамогі. Гэты год у цэлым асаблівы для нас: ён праходзіць пад эгідай захавання гістарычнай памяці нашых дзядоў і прадзедаў, бабуль і прабабуль, якія былі ўдзельнікамі і сведкамі страшнай вайны. Зараз у свеце няпросты час. Мы бачым, як у суседніх краінах апаганьваюць і руйнуюць помнікі, узведзеныя ў гонар нашых воінаў-вызваліцеляў. Мы сталі сведкамі спробаў перапісвання гісторыі, той часткі гісторыі, за якую нашы продкі заплацілі жыццямі, – адзначыла Вольга Петрашова. – Цяпер як ніколі важна працаваць з моладдзю, гаварыць з ёй сумленна і адкрыта аб тым, што такое Вялікая Айчынная вайна, разам успамінаць тых герояў, хто пакінуў свае жыцці на палях бітваў. На такіх уроках памяці мы не толькі гаворым пра гісторыю Беларусі ў гэты перыяд, але і пра гісторыі сем’яў гэтых людзей, бо амаль у кожнага з іх ёсць тыя, хто адстойваў незалежнасць і свабоду нашай краіны ў гады вайны».

Урок памяці праходзіў для вучняў 7-8 класаў. Дзеці падрыхтавалі насычаную тэматычную праграму: чыталі вершы, выконвалі ваенныя песні. А некаторыя падзяліліся асабістымі гісторыямі. Так, вучаніца 8 класа Валерыя Баравікова расказала, што Вялікая Айчынная вайна не абышла бокам і іх сям’ю. «Маёй прабабулі Ніне ўжо 90 гадоў, у гады вайны яна трапіла ў палон да немцаў. Яна не любіць гаварыць на гэту тэму, стараецца яе не закранаць. Гаварыла толькі, што гэта вельмі страшна, – падзялілася школьніца. – Нашы продкі цярпелі цяжкія пакуты дзеля нас. Святкаваць гэта, на самай справе, вялікае свята – наша спроба аддаць даніну памяці тым, хто загінуў. А ўрокі памяці дапамагаюць яшчэ раз вярнуцца да гэтай тэмы, можа, мы і не зможам усіх успомніць пайменна, але ў нашых сілах захаваць гісторыю іх подзвігу».

Яшчэ адна вучаніца 8 класа Эвеліна Андросава расказала пра свайго прадзеда Паўла Іўкавіча Андросава. «У такіх патрыятычных мерапрыемствах я часта прымаю ўдзел. Дзякуючы ім мы ведаем сваю гісторыю, ганарымся героямі. Таму што, напэўна, у кожнага прабабулі і прадзеды сталі сведкамі страшных падзей Вялікай Айчыннай вайны.

У маёй сям’і таксама захоўваецца гісторыя таго часу. Я не была знаёмая са сваім прадзедам, але мне пра яго расказвалі бацькі. Ён падчас вайны пракладваў дарогу праз балота, быў паранены і страціў зрок. У маёй сям’і беражліва адносяцца да яго гісторыі. Тады ён унёс свой уклад і ў маю будучыню – я жыву, вучуся і расту пад мірным і спакойным небам».

Як расказала намеснік дырэктара па вучэбнай рабоце Таццяна Жвалевіч, такія ўрокі памяці пройдуць ва ўсіх класах школы. Усяго тут вучыцца больш за 1,2 тыс. дзяцей. «У нашай школе вучацца актыўныя хлопцы і дзяўчаты. На працягу года яны ўдзельнічаюць у розных патрыятычных акцыях і конкурсах. Акрамя гэтага, за кожным класам замацаваны ветэран, з якім вучні падтрымліваюць зносіны, віншуюць са святамі. Гэта комплексная праца, якая вядзецца на працягу ўсяго навучальнага года», – адзначыла яна.

Сёння Вольга Петрашова наведае яшчэ сем школ Кастрычніцкага раёна Магілёва, дзе таксама прыме ўдзел у тэматычных уроках памяці.

БЕЛТА