З зарастаннем Пячэрскага возера ў Магілёве будуць змагацца з дапамогай пэўных відаў рыб

З зарастаннем Пячэрскага возера ў Магілёве зараз будуць змагацца з дапамогай так званых біямеліяратараў – пэўных відаў рыб. Пра гэта расказаў намеснік начальніка Магілёўскай гарадской інспекцыі прыродных рэсурсаў і аховы навакольнага асяроддзя Ігар Барадзько.

У лістападзе ва ўпадабаным месцы адпачынку гараджан Магілёўская абласная аргструктура Беларускага таварыства паляўнічых і рыбаловаў правяла зарыбленне. У вадаём засялілі шчупака, карпа і белага амура. «Спрабуем ужо біялагічнымі спосабамі змагацца. Белы амур – рыба, якая есць вышэйшую расліннасць. Адпаведна, гэта прыводзіць да памяншэння зарастання возера», – адзначыў Ігар Барадзько.

Біялагічнае абгрунтаванне зарыблення Пячэрскага возера прайшло дзяржаўную экалагічную экспертызу. Спецыялісты разлічваюць, што зарыбленне дасць магчымасць не толькі правесці ачыстку вадаёма ад залішняй расліннасці, але і разнастаіць відавы склад рыбы, якая ў ім жыве.

У рэгіёне ўжо ёсць вопыт біялагічнага спосабу барацьбы з зарастаннем вадаёмаў, але ў самім Магілёве такую практыку ўжылі ўпершыню. Метад зарыблення разглядалі і для ачысткі Святога возера, аднак прымяніць яго там пакуль не ўяўляецца магчымым. «Навукоўцы прыйшлі да высновы, што рана чысціць такім спосабам Святое возера, бо там вельмі вялікі пласт сапрапелю. Да тых часоў, пакуль мы яго не прыбяром, рыбу засяляць туды нельга. Калі мы зараз заселім рыбу, яна будзе размнажацца, а калі потым пачнем прыбіраць сапрапель, на жаль, рыба загіне», – растлумачыў Ігар Барадзько.

«Радыё Магілёў»