Званне «Ганаровы грамадзянін горада Магілёва» прысвоена Вікенцію Ермалёнку

Званне «Ганаровы грамадзянін горада Магілёва» прысвоена Вікенцію Браніслававічу Ермалёнку. Яго кандыдатура зацверджана на сённяшняй 40-й сесіі Магілёўскага гарадскога Савета дэпутатаў.

У Вікенція Ермалёнка адзін запіс у працоўнай кніжцы – ААТ «МАЖЭЛІТ». Вікенція Браніслававіча можна назваць патрыётам прадпрыемства: яго стаж працы ў працоўным калектыве – 47 гадоў, з іх на пасадзе дырэктара – 32 гады! За гады сваёй працы ён унёс вялікі ўклад у тэхнічнае пераўзбраенне вытворчасці, удасканаленне тэхналогіі і прасоўванне прадукцыі на замежныя рынкі. Вікенцій Ермалёнак – сааўтар патэнтаў на спосабы атрымання жэлаціну, аўтар і сааўтар многіх тэхнічных навін, рацыяналізатарскіх прапаноў і вынаходак.

Як паведаміў старшыня Магілёўскага гарадскога Савета дэпутатаў Максім Гурын, Вікенцій Браніслававіч унёс вялікі ўклад у развіццё Магілёва.

– Узначаленае ім прадпрыемства штогод становіцца найлепшым у гарадскім спаборніцтве па выніках сацыяльна-эканамічнага развіцця горада ў сферы «прамысловасці». З яго імем звязана рэалізацыя буйных праектаў. У спісе заслуг дырэктара – рэканструкцыя ўчасткаў экстракцыі, фільтрацыі, упарвання, жэлацінізацыі, сушкі і фасоўкі, што дазволіла павялічыць выпуск жэлаціну з 1100 да 2200 тон на год і павысіць якасць прадукцыі; участкаў дэмінералізаціі касцявога шроту, вытворчасці кармавой дабаўкі, рэзкі мяккай сыравіны і іншых. Прадпрыемства шматразова станавілася лаўрэатам конкурсаў «Найлепшыя тавары Рэспублікі Беларусь» і «Найлепшыя тавары Рэспублікі Беларусь на рынку Расійскай Федэрацыі». Па выніках працы за 2020 год ААТ «МАЖЭЛІТ» занесена на Рэспубліканскую дошку Гонару.

Імя Вікенція Ермалёнка будзе ўнесена ў Памятную кнігу ганаровых грамадзян Магілёва, а на плошчы Зорак з’явіцца яго імянная зорка, якую плануюць урачыста адкрыць 2 ліпеня падчас святкавання Дня горада.

vestnikmogileva.by