Уборку азімага ячменю пачалі 9 раёнаў Магілёўскай вобласці

У Магілёўскай вобласці ўборку азімага ячменю пачалі 9 раёнаў. Пра гэта паведамілі ў аддзеле раслінаводства камітэта па сельскай гаспадарцы і харчаванні Магілёўскага аблвыканкама.

Азімы ячмень сабраны на плошчы амаль 1,3 тыс. га. «Цяпер у рэгіёне ідзе выбарачная ўборка гэтай культуры. Глядзім па меры яе паспявання. Актыўна работы пачалі паўднёвыя раёны: больш за ўсё сабрана ў Бабруйскім, Кіраўскім і Асіповіцкім раёнах. Паўночныя раёны пакуль не пачалі жніво – тут азімы ячмень яшчэ спее», – адзначылі спецыялісты.

Усяго азімы ячмень у Магілёўскай вобласці неабходна сабраць з плошчы 5,5 тыс. га.

Пачалі ў рэгіёне і ўборку азімай свірэпіцы – работы ідуць таксама ў 9 раёнах. Яна сабрана з плошчы амаль 460 га, што складае 40% ад плана. Усяго азімую культуру ў рэгіёне неабходна сабраць з плошчы 1,1 тыс. га.

БЕЛТА