У першы дзень прыёму дакументаў у ВНУ ў Беларуска-Расійскім універсітэце было ажыўлена

У першы дзень прыёму дакументаў у ВНУ у Беларуска-Расійскім універсітэце ў Магілёве было ажыўлена. А 9 раніцы ў актавай зале ўжо назіралася чарга з некалькіх дзясяткаў абітурыентаў. Сучасная ВНУ, актуальныя спецыяльнасці, інавацыйная матэрыяльна-тэхнічная база, плюс забяспечваюць інтэрнатам, а яшчэ тут ужо вучацца сябры... Так у большасці сваёй адказвалі на пытанне, чаму выбар упаў менавіта на БРУ, патэнцыйныя студэнты. Дарэчы, універсітэт, які больш за 60 гадоў рыхтуе запатрабаваных на рынку працы спецыялістаў, сёлета прыме каля тысячы дзяцей, з якіх больш за 600 – на бюджэт. А вучацца яны тут па беларускіх і расійскіх адукацыйных праграмах.

19-гадовы Алег Ігнатовіч з вёскі Заполле Бялыніцкага раёна ў будучыні бачыць сябе інжынерам па інфармацыйных тэхналогіях.

– Пасля каледжа працую праграмістам у школе ў Жодзіне. Але, каб была магчымасць кар’ернага росту, працаўладкавання на прадпрыемства – дзяржаўнае або прыватнае – патрэбна вышэйшая адукацыя. Пра БРУ я чуў выключна станоўчыя водгукі, спадзяюся стаць яго студэнтам.

Факультэтаў у БРУ – сем, спецыяльнасцяў – больш за 30.

У абітурыентаў найбольш папулярныя тыя, што звязаныя з IT‑тэхналогіямі і эканомікай, у топе – «Аўтаматызаваныя сістэмы апрацоўкі інфармацыі», «Транспартная лагістыка», «Электронны маркетынг». Ідучы ў нагу з часам, за апошнія 3,5 гады адкрылі дзевяць новых спецыяльнасцяў. Гэты год не выключэнне. Прапануем дзве новыя, якія, упэўнены, будуць запатрабаваныя – «Прыкладная механіка» і «Нафтагазавая справа», – падкрэслівае рэктар БРУ Міхаіл Лусцянкоў.

17-гадовы магілёвец Клімент Міргародскі «прыцэньваецца» да новай спецыяльнасці:

– Пры паступленні можна выбіраць некалькі сумежных. У мяне ў прыярытэце «Электраэнергетыка і электратэхніка». Гэта вельмі перспектыўны кірунак. Планую трапіць на бюджэт. Але ў якасці варыянта разглядаю і «Прыкладную механіку». Бацька, які са мной прыйшоў сёння ў ВНУ ў якасці падтрымкі, параіў яе адзначыць. Ён усё жыццё на прадпрыемстве працуе – спачатку на «Ліфтмашы», цяпер на «Зеніце», які ўваходзіць у склад холдынгу, і дакладна ведае, што за гэтымі прафесіямі будучыня.

Аднагодак і зямляк Кліменція Ігар Барадаўка абраў будаўнічы факультэт. Прызнаецца: «У маім родзе ніхто не працаваў у гэтай сферы, а я ў 16 гадоў на летніх канікулах пайшоў дарожным рабочым. Зацягнула. Вырашыў: буду будаваць аўтамагістралі. Справа важная. Бацькі адобрылі мой выбар».

Ігару пашанцавала. Яго, першага абітурыента, які падаў дакументы, асабіста павіншаваў рэктар Міхаіл Лусцянкоў, уручыўшы хлопцу са словамі пажадання сувеніры з сімволікай універсітэта: нататнік, ручку, флешку і кнігу «БРУ: учора, сёння, заўтра».

Такое ж выданне і ручку з лагатыпам ВНУ дэкан машынабудаўнічага факультэта, адказны сакратар прыёмнай камісіі БРУ Дзмітрый Свірэпа падарыў першаму абітурыенту, які абраў іх факультэт.

Завуць яго Яўген Лэхцікаў, яму 17 гадоў, прыбыў з аграгарадка Тупічына Касцюковіцкага раёна:

– Ведаю, што ў БРУ выдатны выкладчыцкі склад, сучасная матэрыяльна-тэхнічная база. Машынабудаўнікі заўсёды будуць у трэндзе. А я выбраў папулярную спецыяльнасць – «Вытворчасць вырабаў на аснове трохмерных тэхналогій». Што яшчэ важна для мяне, іншагародняга, усіх студэнтаў ВНУ на 100% забяспечвае інтэрнатам.

– Нягледзячы на тое што мы называемся Беларуска-Расійскім універсітэтам, нас усе ведаюць і памятаюць як машынабудаўнічы інстытут, або «Машынку». Гэта брэнд, знак якасці, нашы выпускнікі працуюць не толькі ў Беларусі, але і па ўсім свеце. І ў працадаўцаў найбольшую цікавасць якраз выклікаюць класічныя тэхнічныя напрамкі: «Тэхналогія машынабудавання», «Тэхналагічнае абсталяванне машынабудаўнічай вытворчасці», «Абсталяванне і тэхналогія зварачнай вытворчасці», «Інавацыйная тэхніка для будаўнічага комплексу», – падкрэслівае Дзмітрый Свірэпа. – На аднаго выпускніка паступае чатыры заяўкі, а то і больш. Прычым прапануюць ім добрыя ўмовы працы і годны заробак.

Паступаюць у БРУ і дзяўчаты. 17-гадовая Вераніка Доўгая абрала факультэт эканомікі: «Была ў ВНУ на дні адчыненых дзвярэй, уразіла. Вучыцца планую па спецыяльнасці «Транспартная лагістыка» або «Фінансы і крэдыт».

Дарэчы, падаць дакументы ў БРУ можна дыстанцыйна – у ВНУ ёсць электронная база «Абітурыент». Гэта спрашчае сістэму, эканоміць час. І большасць расіян ужо не першы год карыстаецца гэтай магчымасцю. На сённяшні дзень паступаць у ВНУ ў Магілёве выказала жаданне 14 чалавек з Пскоўскай, Бранскай, Калінінградскай абласцей і Краснадарскага краю. Мікіта Новікаў з горада Вялікія Лукі абраў адразу пяць спецыяльнасцей, адна з іх адкрыта ў гэтым годзе – «Нафтагазавая справа».

А ўсяго, як правіла, у першы дзень падачы дакументаў у БРУ ў рэальным і анлайн-рэжыме прымаюць ад 150 да 200 чалавек.

СБ