Валерый Іваноў: граматная ўборка ўраджаю з палёў забяспечыць харчбяспеку краіны

Граматная ўборка ўраджаю з палёў забяспечыць харчовую бяспеку нашай краіны. Пра гэта сказаў кіраўнік спраў Прэзідэнта Валерый Іваноў падчас раённага свята «Зажынкі», які прайшоў на полі ААТ «Александрыйскае» ў Шклоўскім раёне.

«Хлебныя палі ў гэтым годзе радуюць вока. Гэта дзякуючы таму, што ўсе вы прыклалі максімум намаганняў, каб вырасціць добры ўраджай. Але гаварыць пра ўраджай можна толькі тады, калі гэтае зерне ляжа ў засекі, – падкрэсліў ён. – Адказнасць, якая была падчас вясновых палявых работ, догляду пасеваў, цяпер падвоіцца».

Валерый Іваноў адзначыў, што бязладныя адносіны да ўборкі ўраджаю могуць паставіць крыж на ўсіх папярэдніх працах і выдатках. «Першыя вынікі абнадзейваюць: амаль 70 ц/га. Патэнцыял Шклоўскага раёна я ведаю не па чутках. І гэты патэнцыял павінен праявіцца ў выніках», – сказаў ён.

Падчас уборачнай нельга дапускаць страт. «Страты, як сказаў кіраўнік дзяржавы, – гэта злачынства. Я звяртаюся да механізатараў. Вы на гэта поле вяртаецеся некалькі разоў, пачынаючы ад яго падрыхтоўкі, догляду пасеваў, а цяпер ужо на камбайнах. Таму я прашу: шануйце сваю працу. Я жадаю нам выканаць тыя задачы, якія перад намі ставіць кіраўнік дзяржавы, наша краіна. Граматная ўборка ўраджаю забяспечыць харчовую бяспеку, у краіне будзе хлеб і дастатак», – падкрэсліў Валерый Іваноў.

БЕЛТА, фота Галіны Гаўрыловіч