Хлебаробы СВК «Калгас “Радзіма”» першымі ў Магілёўскай вобласці намалацілі 4 тыс. т

Хлебаробы СВК «Калгас “Радзіма”» (Бялыніцкі раён) Мікалай Дарэчкін і Яўген Сарбаеў першымі ў Магілёўскай вобласці намалацілі 4 тыс. т збожжа. Пра гэта паведамілі ў абласным аб’яднанні прафсаюзаў.

Ушанаванне перадавікоў адбылося раніцай 25 жніўня на машынным двары гаспадаркі. Лідары ўборачнай прымалі віншаванні і грашовыя прэміі за сваю працу ў тым ліку і ад прафсаюзаў. Старшыня Магілёўскага абласнога аб’яднання прафсаюзаў Янкоў Дзмітрый падзякаваў экіпажу за ўклад ва ўраджай гэтага года, пажадаў камбайнерам здароўя і ўдачы. «Вашымі вынікамі і дасягненнямі ганарыцца ўся вобласць, будзьце і далей лідарамі ў гэтай нялёгкай справе і ўслаўляйце сваю малую радзіму самаадданай працай», – падкрэсліў ён.

Віншаванні і заслужаныя ўзнагароды таксама прымаў моладзевы экіпаж Уладзіміра Казакова і Віктара Васільева, які дасягнуў па намалотах выніку ў 3 тыс. т, а таксама тандэм Юрыя Зайцава і Артура Кудзіна, які пераадолеў на ўборачнай двухтысячны рубеж.

На сённяшні дзень хлебаробы Бялыніцкага раёна ўбралі 15,4 тыс. га, або 90% плошчаў збожжавых і зернебабовых культур, намалочана 57,5 тыс. т, сярэдняя ўраджайнасць перавысіла 37,4 ц/га. Гэта адзін з найлепшых паказчыкаў у Магілёўскай вобласці – трэці вынік пасля Шклоўскага і Кіраўскага раёнаў.

Усяго ў рэгіёне ўбрана 293,7 тыс. га, або 89%, намалочана 914,1 тыс. т пры сярэдняй ураджайнасці 31,1 ц/га. Па прагнозах, да пачатку наступнага тыдня, праз 3-4 дні, рэгіён пераадолее па намалотах мяжу ў 1 млн т.

БЕЛТА