Прэм’еру спектакля па паэме Янкі Купалы «Магіла льва» прадставяць у Магілёўскім тэатры лялек у лістападзе

Магілёўскі абласны тэатр лялек рыхтуе прэм’еру «Магіла льва» па матывах народных паданняў і паэме Янкі Купалы. Прэм’ера спектакля новага сезона запланавана на 29 лістапада. Пра гэта паведамілі ва ўстанове культуры.

Рэжысёрам-пастаноўшчыкам спектакля пра народнага героя Машэку выступіла Марыя Гуцава, для яе прэм’ера стане першым праектам на магілёўскай сцэне. «Я родам не з Магілёва, таму спектакль стане своеасаблівым знаёмствам з гэтай зямлёй, – пераканана Марыя Гуцава. – Работа будзе цікавая і карэнным жыхарам, якія, упэўнена, даведаюцца шмат новага з гісторыі горада: якія людзі тут жылі, чым займаліся, пра што марылі і як любілі. У першую чаргу гэта будзе спектакль пра чалавека і для людзей».

Прэм’ера будзе напоўнена глыбокім філасофскім сэнсам. Яна прапануе гледачу адказаць на пытанні: хто мы і куды цяпер ідзём, ці ведаем і ці памятаем гісторыю сваёй зямлі? «Каб адказаць на гэтыя пытанні, трэба вярнуцца да сваіх каранёў, звярнуцца да гісторый з жыцця нашых продкаў, якія захавалі шмат цікавага. Напрыклад, паданне пра легендарнага асілка Машэку, якога здрада ператварыла ў раз’юшанага ў адносінах да несправядлівасці льва. Пасля смерці героя яго высокую магілу ў народзе сталі называць «магілай льва». Затым на гэтым месцы вырас горад, які цяпер носіць назву Магілёў», – дадалі ў тэатры.

БЕЛТА