Абласны конкурс «Я патрыёт сваёй краіны» пройдзе ў Магілёве 16 лютага

Абласны конкурс «Я патрыёт сваёй краіны» адбудзецца 16 лютага ў Магілёўскім абласным цэнтры творчасці. Пра гэта паведамілі ва ўстанове дадатковай адукацыі дзяцей і моладзі.

Як растлумачылі арганізатары, конкурс праводзіцца ў рамках беларуска-расійскага праекта «Цягнік Памяці» з мэтай выяўлення і распаўсюджвання вопыту паспяховай работы лідэраў, фарміравання ў грамадскай і індывідуальнай свядомасці пазітыўнага вобразу юнага лідэра.

Удзел у рэгіянальным спаборніцтве прымуць 19 дзесяцікласнікаў з усёй вобласці. Усе яны пераможцы завочнага этапа конкурсу.

У фінале хлопцам трэба будзе ў візітнай картцы расказаць пра сябе, свае захапленні і праекты, прадэманстраваць здольнасці ў творчым спаборніцтве «Я магу» і паўдзельнічаць у інтэлектуальна-пазнавальнай гульні «Памяць пакаленняў».

Па выніках конкурсу восем пераможцаў прадставяць Магілёўскую вобласць у сумесным беларуска-расійскім праекце «Цягнік памяці-2023».

Рэд.