Увесну ў Магілёўскім лясгасе не менш за 50% пасадачнага матэрыялу складуць сеянцы з закрытай каранёвай сістэмай

Увесну ў Магілёўскім лясгасе не менш за 50% пасадачнага матэрыялу складуць сеянцы з закрытай каранёвай сістэмай. Пра гэта расказала інжынер па лесааднаўленні і меліярацыі Магілёўскага лясгаса Вольга Дзешчаня.

«Увесну гэтага года ў нашым лясгасе лесааднаўленчыя работы будуць праведзены на плошчы 393 га. Каля 50% пасадачнага матэрыялу складуць сеянцы з закрытай каранёвай сістэмай, якія вырошчваюцца на нашым комплексе па вырошчванні такога пасадачнага матэрыялу. Гэта будзе хвоя звычайная, елка і алешына. Плошча такіх пасадак складзе каля 200 га, - распавяла яна. - Сеянцы з закрытай каранёвай сістэмай паказваюць больш высокую прыжывальнасць».

Як расказала інжынер па лесааднаўленні і меліярацыі Магілёўскага лясгаса Вольга Арцёмчук-Храмцова, летась у гадавальніцкай гаспадарцы было вырашчана 7,3 млн пасадачнага матэрыялу, з якіх 5,4 млн былі сеянцы з закрытай каранёвай сістэмай. «У гэтым годзе аб'ёмы будуць не меншыя. У 2022 годзе частка нашага пасадачнага матэрыялу пайшла на экспарт - попыт быў высокі, сёлета асноўная стаўка робіцца на ўнутраныя патрэбнасці лясных гаспадарак. Мінулагодняя непагадзь пашкодзіла вялікія тэрыторыі, якія цяпер трэба аднавіць», - распавяла яна.

Сур'ёзную дапамогу ў лесааднаўленчых работах Магілёўскі лясгас атрымлівае падчас рэспубліканскай акцыі «Тыдзень лесу». «Прыемна адзначыць, што гэтая акцыя з кожным годам набірае абароты: да нас паступае ўсё больш заявак ад жадаючых далучыцца да пасадкі будучых лясоў. У гэтым годзе такая дапамога вельмі дарэчы, - адзначыла Вольга Дзешчаня. - Больш за ўсё людзей да нас плануе далучыцца 22 красавіка. У гэты дзень прадстаўнікі розных установаў і прадпрыемстваў, установаў адукацыі і моладзь будуць працаваць ва ўсіх нашых лясніцтвах».

БЕЛТА