Выпускные экзамены в 9-х классах пройдут в Беларуси с 1 по 9 июня

Выпускныя экзамены ў 9-х класах пройдуць у Беларусі з 1 па 9 чэрвеня. Аб гэтым журналістам паведаміла намеснік начальніка галоўнага ўпраўлення агульнай сярэдняй, дашкольнай і спецыяльнай адукацыі - начальнік упраўлення агульнай сярэдняй адукацыі Міністэрства адукацыі Ірына Каржова.

«Выпускныя экзамены ў 9-х класах пройдуць з 1 па 9 чэрвеня. Такія вучні да 25 мая павінны быць атэставаны за чацвёртую чвэрць і за навучальны год па ўсіх вучэбных прадметах. У якасці выпускных экзаменаў 9-класнікам у бягучым годзе трэба будзе здаць чатыры прадметы: рускую і беларускую мову (пераказ, у мінулым годзе гэта быў дыктант), матэматыка - кантрольная работа, гісторыя Беларусі - вусна. На напісанне пераказу і кантрольнай работы па матэматыцы адведзена 4 астранамічныя гадзіны. Тэксты для правядзення выпускных экзаменаў у пісьмовай форме ў 9-м класе будуць, як і раней, аб'яўляцца ў сродках масавай інфармацыі і размяшчацца на сайце Міністэрства адукацыі», - расказала Ірына Каржова.

Выпускныя экзамены ў пісьмовай форме пройдуць 1, 5 і 7 чэрвеня. Канкрэтны расклад зацвярджаецца кіраўніком школы з улікам рэкамендацый, устаноўленых Міністэрствам адукацыі.

Паводле слоў прадстаўніка Міністэрства адукацыі, зборнікі для напісання пераказу на выпускным экзамене ў 9-м класе былі выдадзены яшчэ восенню 2022 года і дастаўлены ва ўстановы адукацыі для падрыхтоўкі. Для напісання кантрольнай работы па матэматыцы выкарыстоўваюцца зборнікі, пачынаючы з 2020 года выдання, у 2023 годзе зборнікі перавыдаваліся.

Выпускныя экзамены па гісторыі Беларусі будуць праводзіцца па білетах, зацверджаных Міністэрствам адукацыі. «Кожны білет змяшчае два пытанні. Другое пытанне прадугледжвае выкананне практычнага задання, накіраванага на праверку ўмення вучняў працаваць з рознымі крыніцамі гістарычнай інфармацыі: фрагментамі гістарычнага дакумента, гістарычнай карты, схемай, табліцай, дыяграмай, графікам, ілюстрацыяй і гэтак далей. У 2022/2023 навучальным годзе прынята рашэнне, што выпускны экзамен у 9-м класе па гісторыі Беларусі будзе праводзіцца з выкарыстаннем адзіных практычных заданняў. З 1 лютага на Нацыянальным адукацыйным партале быў створаны банк матэрыялаў для падрыхтоўкі да выпускнога экзамену па гісторыі Беларусі. Ён быў сфарміраваны па прапановах, што паступілі ад школьных настаўнікаў гісторыі. З гэтага банка будуць сфарміраваны заданні для білетаў па гісторыі Беларусі. Банк экзаменацыйных заданняў будзе адкрыты 25 мая. І з 25 мая па 1 чэрвеня ва ўстановах адукацыі будуць праходзіць кансультацыі па падрыхтоўцы да выпускных экзаменаў. У час іх могуць быць выкарыстаны канкрэтныя заданні, якія вучні атрымаюць, выцягнуўшы білет па гісторыі Беларусі», - праінфармавала намеснік начальніка галоўнага ўпраўлення.

Ірына Каржова дадала, што выпускныя экзамены ў 9-х класах будуць праводзіцца ва ўстановах адукацыі, у якіх вучні навучаюцца. Цяпер там ствараюцца камісіі для прыёму выпускнога экзамену з ліку сваіх педагагічных работнікаў.

БЕЛТА