Дапамога побач: сацыяльнае таксі для людзей з інваліднасцю працуе ў Магілёве

Сацыяльнае таксі для людзей з інваліднасцю працуе ў Кастрычніцкім раёне Магілёва. Пра гэта паведаміла загадчыца аддзялення сацыяльнай рэабілітацыі, абілітацыі інвалідаў Цэнтра сацыяльнага абслугоўвання насельніцтва Кастрычніцкага раёна горада Наталля Шэйко.

Паводле слоў Наталлі Шэйко, сацыяльнае таксі - запатрабаваная паслуга, якая дапамагае інвалідам дабірацца да патрэбнага аб'екта. «Бясплатна скарыстацца такой паслугай могуць інваліды І групы ўсіх катэгорый. Бясплатны праезд даецца і суправаджаючаму, - распавяла яна. - Сацыяльнае таксі даставіць людзей з абмежаванымі магчымасцямі да іншых сацыяльных аб'ектаў, напрыклад ва ўстанову аховы здароўя. Акрамя гэтага, штогод мы можам дапамагчы наведаць людзям з інваліднасцю месцы пахавання родных і блізкіх. Дастаўка людзей робіцца па горадзе Магілёве».

Чарговасць на такое таксі будуецца па заяўным прынцыпе. Падаць заяўку на паслугу можна ў працоўныя дні па тэлефонах: 8 (0222) 65-24-31, 8 (0222) 65-45-85.

БЕЛТА