Беларускі Арына Мартынава і Алеся Гетманава выйшлі ў фіналы маладзёжнага чэмпіянату свету па барацьбе

У сталіцы Іарданіі Амане працягваецца маладзёжны чэмпіянат свету па барацьбе, удзел у якім прымаюць беларускія спартсмены.

У трэці дзень спаборніцтваў адбыліся паядынкі ў пяці вагавых катэгорыях сярод дзяўчат. Беларуска Арына Мартынава, якая выступае ў вазе да 55 кг, прайшла па турнірнай сетцы да фіналу. На стадыі адной восьмай наша спартсменка адолела Айсанам Курбанбаеву з Узбекістана, у чвэрцьфінале Арына была мацнейшай за амерыканку Амані Джонс, а ў паўфінале выбіла з барацьбы за золата ўкраінку Альбіну Рылю. Саперніцай беларускі па вырашальным паядынку, які пройдзе ў вячэрняй праграме 17 жніўня, стала Джорджыяна Карла Лірка з Румыніі.

Таксама шлях да фіналу ў вагавой катэгорыі да 59 кг зрабіла і наша Алеся Гетманава. У 1/8 фіналу беларуска справілася з Аляксандрай Вітас з Польшчы, у наступным раундзе Алеся пакінула не ў спраў турчанку Севім Акбас, а ў паўфінале - Калміру Білімбек з Кыргызстана. Сутычка беларускі за золата ЧС супраць італьянкі Аўроры Русо таксама адбудзецца сёння вечарам. Дарэчы, на мінулым тыдні і Алеся Гетманава, і Арына Мартынава сталі чэмпіёнкамі II Гульняў краін СНД.

Акрамя таго, за бронзавы медаль чэмпіянату свету ў чацвер будзе змагацца наша Аліна Шаўчук (в/к да 68 кг), яе апанентка вызначыцца заўтра ў дзённай праграме. Яшчэ дзве беларускі - Святлана Каценка (да 50 кг) і Аляксандра Казлова (да 76 кг) - паспрабуюць прабіцца ў медальныя сутычкі праз суцяшальныя паядынкі.

БЕЛТА