Выхаванец магілёўскай гімнастычнай школы Ягор Шарамкоў выйграў золата Кубка Расіі ў вольных практыкаваннях

На «Сірыус-Арэне» ў Сочы працягваецца Кубак Расіі па спартыўнай гімнастыцы з удзелам беларускіх спартсменаў.

У суботу спартсмены вызначалі наймацнейшых у фіналах асобных відаў, мужчыны разыгралі тры камплекты ўзнагарод, жанчыны - два. У вольных практыкаваннях на вышэйшую прыступку пастамента падняўся наш Ягор Шарамкоў, які за сваю праграму зарабіў 14,733 ачка. Амаль на паўбала беларус апярэдзіў алімпійскага чэмпіёна з Расіі Мікіту Нагорнага. Дарэчы, перамогу на Кубку Расіі ў вольных практыкаваннях Шарамкоў атрымлівае другі год запар. Блізкі да п'едэстала сёння быў яшчэ адзін беларускі гімнаст Мікіта Парфяновіч - у практыкаванні на кані наш спартсмен стаў чацвёртым. У апорным скачку ў жанчын беларуска Дар'я Жукоўская заняла сёмае месца.

Кубак Расіі па спартыўнай гімнастыцы ў Сочы завершыцца заўтра. У праграме нядзелі мужчынскія фіналы на брусах, перакладзіне і ў апорным скачку, а таксама жаночыя спаборніцтвы на бервяне і ў вольных практыкаваннях.

БЕЛТА