У Магілёве вядзецца ачыстка рэчышча ракі Дубравенка

У Магілёве вядзецца ачыстка рэчышча ракі Дубравенка. Пра гэта паведаміў намеснік дырэктара камунальнага прадпрыемства «Магілёўзелянбуд» Дзмітрый Грышачка.

Ачыстка правага прытоку Дняпра пачалася каля двух з паловай тыдняў таму і будзе праходзіць да таго часу, пакуль дазваляюць умовы надвор'я. У рацэ сталі ўтварацца намывы і наносы - глеістыя навалы, гразевыя астраўкі, камяністыя адклады. Таксама засмечвае ваду прыбярэжная расліннасць - лісце і галінкі дрэў. У забруджаным рэчышчы расліннае смецце гніе, перашкаджае вольнаму адтоку вады.

Работы пачаліся ад месца, дзе рака працякае пад мастом па пр.Міра, і ўжо дайшлі да ўчастка, дзе яна праходзіць пад пуцеправодам па вул.Лазарэнка. Работнікі прадпрыемства прасоўваюцца ў напрамку ракі Дняпро. Задзейнічаны пагрузчыкі, экскаватары, самазвалы.

«Рака Дубровенка - адна з цэнтральных рэкрэацыйных зон горада, якая мае патрэбу ў рэгулярным доглядзе, ачыстка рэчышча - неабходнае мерапрыемства па добраўпарадкаванні», - адзначыў Дзмітрый Грышачка.

Па словах намесніка старшыні Магілёўскага абласнога камітэта прыродных рэсурсаў і аховы навакольнага асяроддзя Ігара Бародзькі, Дубравенка з'яўляецца месцам пасялення дробнай рыбы і баброў, аблюбавалі яе і зграі качак. Калі рэчышча не пачысціць, то вада будзе застойвацца і квітнець, што не вельмі спрыяльна адаб'ецца на мясцовай фауне. Ачыстка ракі ад смецця і глею - гэта вялікі плюс для экалогіі.

Агульная працягласць ракі Дубравенка складае прыкладна 18 км, яна бярэ свой пачатак у вёсцы Сафіеўка Магілёўскага раёна. Сёння па шырыні гэта невялікі прыток Дняпра. Але ў 30-я гады мінулага стагоддзя па рацэ хадзілі вялікія судны, на ёй стаялі вадзяныя млыны і была абсталявана прыстань.

БЕЛТА