Хакеісты «Дынама-Шынніка» абгулялі «Капітан» у МХЛ

Хакеісты бабруйскага «Дынама-Шынніка» атрымалі перамогу ў госцевым матчы Маладзёжнай хакейнай лігі.

У сераду падапечныя Андрэя Міхалёва на выездзе сустракаліся з прадстаўніком Залатога дывізіёна МХЛ «Капітанам» са Ступіна. Рахунак у матчы быў адкрыты ўжо на чацвёртай хвіліне матчу форвардам «шыннікаў» Мацвеем Шыдлоўскім, а незадоўга да сыходу на перапынак перавагу нашай каманды падвоіў Міраслаў Міхалёў. У другім перыядзе вароты ступінскага клуба паразіў Аляксандр Ярмоленка, яшчэ адну шайбу да запасу бабруйчан у заключнай трэці дадаў Мікалай Салыга. Гаспадары лёду здолелі адказаць толькі аднойчы, у выніку 4:1 - пераканаўчая вікторыя «Дынама-Шынніка».

На дадзены момант юныя дынамаўцы з 23 ачкамі займаюць другое месца ў Сярэбраным дывізіёне Заходняй канферэнцыі МХЛ, саступаючы толькі падмаскоўнаму «Атланту». Апошні паядынак у рамках бягучай выязной серыі беларусы правядуць 28 кастрычніка ў Туле супраць мясцовай «Акадэміі Міхайлава». Сустрэча стартуе ў 13.00.

БЕЛТА