Напярэдадні старту Суперсерыі зборныя Беларусі і Расіі па гандболе правялі ў Магілёве трэніроўкі

01.11.202310:23

Тры таварыскія матчы згуляюць зборныя Беларусі і Расіі па гандболе ў Магілёве, Гомелі і Мінску. Першая сустрэча адбудзецца ўжо сёння, 1 лістапада, у спарткомплексе «Алімпіец». І напярэдадні старту Суперсерыі каманды апрабавалі пляцоўку падчас трэніровак.

Галоўны трэнер беларускай нацыянальнай каманды Юрый Шаўцоў:

- Міжнародныя матчы не гуляем два гады, і каб зразумець, у якім стане зараз знаходзімся, трэба з кімсьці параўнацца. Праўда, саперніка выбіраць не даводзіцца, зрабіць гэта можам толькі на фоне расіян, але і гэтаму вельмі рады. Вырашылі выступіць у розных гарадах і прэзентаваць там нашу нацыянальную зборную. Ведаю, што яе любяць і чакаюць, усе засумавалі па гандболе. Заўзятары жадаюць паглядзець на гульню Вайлупава, Каролька, Салдаценкі, Кулеша, іншых спартсменаў.

У заяўцы зборнай Беларусі 20 гандбалістаў.

- Рады, што ўсе нашы хлопцы адгукнуліся на выклік. Былі ў гэтым упэўненыя, таму што зборная ёсць зборная, усе з задавальненнем сюды едуць, - зазначыў Юрый Анатольевіч. - Нажаль, не змаглі падлучыць да збору некаторых траўміраваных гульцоў, але кампенсавалі іх адсутнасць перспектыўнымі рабятамі, якія ўжо гуляюць у нацыянальнай камандзе або прэтэндуюць на выклік. Гэта дае свой пазітыўны плён сістэма, напрацаваная яшчэ летась. Пры гэтым падкрэслю, у нас яшчэ ёсць гульцы, якія маглі б зборную дадаткова ўмацаваць: гэта траўміраваныя Самойла, Гайдучэнка, Гірык, Мароз.

Убачаным сёння падчас заняткаў Юрый Шаўцоў задаволены:

- З пачатку збору правялі дзве трэніроўкі, і скажу так - заўтра мы павінны выйграць. Думаю, ідзем у правільным кірунку. Нельга дапусціць спаду. Наадварот, трэба з гэтай сітуацыі з санкцыямі выйсці яшчэ мацней.