«Барысфен» падоўжыў серыю перамог у чэмпіянаце Беларусі па баскетболе

Баскетбалісты «Барысфена» працягваюць перамагаць у матчах чэмпіянату Беларусі.

Сваю дзевятую запар вікторыю магіляўчане здабылі 7 лістапада ў сябе дома, упэўнена перайграўшы рэзервістаў «МІНСКА» з вынікам 94:68. Цяпер у актыве каманды Андрэя Крываноса 18 ачкоў, баскетбалісты «Гродна-93» адстаюць на 4 балы. Праз тыдзень, 14 лістапада, два фаварыты нацыянальнага першынства правядуць вочны паядынак у Гродне. На трэцім месцы турнірнай табліцы знаходзіцца рэзервовы склад БК «МІНСК», у якога 13 ачкоў, сталічны «Імпульс-БДУІР» і віцебскі «Рубон» набралі па 11 заліковых балаў.

Лідэрамі жаночага чэмпіянату Беларусі з'яўляюцца баскетбалісткі «МІНСКА», у якіх 14 ачкоў з 14 магчымых. Дзеючы чэмпіён краіны «Гарызонт» і ўладальнік сярэбраных медалёў гродзенская «Алімпія» маюць па 13 балаў.

БЕЛТА