На Магілёўшчыне падведзены вынікі рэгіянальнага конкурсу «Навагодняя фантазія»

Конкурс дэкаратыўна-прыкладнога мастацтва праводзіцца ўжо трэці год і кожны раз збірае на адной пляцоўцы найлепшыя творы майстроў дэкаратыўна-прыкладной творчасці з усёй вобласці. Яго ўдзельнікамі па традыцыі становяцца індывідуальныя майстры, творчыя калектывы, прадстаўнікі клубных фарміраванняў, спецыялісты дамоў і цэнтраў рамёстваў. Узрост іх самы розны. Напрыклад, у сёлетнім конкурсе самай юнай стала 12-гадовая Ксенія Калеснева з Дрыбінскага раёна. Яе праца ўпрыгожыла фае Магілёўскага абласнога метадычнага цэнтра народнай творчасці і культурна-асветнай працы, які выступае арганізатарам «Навагодняй фантазіі».

Усяго на фінальнай выставе прадстаўлены 24 лепшыя работы: навагоднія ёлкі, святочныя ўпрыгожанні, кампазіцыі з саломкі, дрэва і іншых матэрыялаў. Ацэньвала іх журы ў трох намінацыях: «Лепшая навагодняя ёлка», «Лепшая навагодняя кампазіцыя» і «Лепшы сімвал года», улічваючы пры гэтым арыгінальнасць аўтарскай задумкі, складанасць афармлення і мастацкі ўзровень майстэрства, гарманічнае спалучэнне народных традыцый і творчай індывідуальнасці, адпаведнасць навагодняй тэматыцы. . Пераможцы былі ўдастоены дыпломаў.

Дыпломамі І ступені ўзнагароджаны: у намінацыі «Лепшая навагодняя ёлка» - калектыў майстроў Гарадзецкага дома рамёстваў Шклоўскага раёна, у намінацыі «Лепшая навагодняя кампазіцыя» - Цэнтралізаваная клубная сістэма Бабруйскага раёна, у намінацыі «Лепшы сімвал года» - творчы калектыў Дома рамёстваў аграгарадка Кароўчына раёна і творчы калектыў раённага цэнтра культуры Цэнтралізаванай клубнай сістэмы Магілёўскага раёна.

– Конкурс накіраваны на актывізацыю дзейнасці клубных арганізацый вобласці, павышэнне творчага патэнцыялу майстроў, развіццё цікавасці да культурных традыцый, папулярызацыю дэкаратыўна-прыкладной творчасці, – падкрэсліла вядучы рэдактар Магілёўскага абласнога метадычнага цэнтра НТіКПР Крысціна Башарымава. - Лепшыя работы майстроў будуць радаваць магіляўчан і гасцей горада на адкрытай пляцоўцы цэнтра да 14 студзеня.

СБ