Да памятнай даты - кветкі для бабруйчанкі Веры Салановіч, былой вязніцы лагера Азарыч

80 гадоў таму ў гэты дзень байцы Чырвонай Арміі вызвалілі больш за 33 тысячы вязняў нацысцкага лагера смерці Азарычы. Сярод іх была і маленькая Вера Кур'ян з сям'ёй, якія спаўна спазналі жахі, нягоды і гора вайны. Менавіта тады, 19 сакавіка 1944 года, ваенны карэспандэнт зрабіў фота дзяўчынкі. Гэты легендарны здымак дзіцяці з пранізлівым чыстым позіркам потым убачылі ў многіх краінах свету. 19 сакавіка бабруйчанцы Веры Сяргееўне Салановіч (прозвішча па мужу) ужо 85 гадоў, і яна захоўвае тую фатаграфію, як напамін пра тое, колькі пакут перажыла з роднымі ў страшныя гады Вялікай Айчыннай.

Да 80-годдзя вызвалення вязняў лагера Азарычы праходзяць памятныя мерапрыемствы. Былую вязню Веру Салановіч у гэты дзень таксама не пакінулі без увагі: яе наведала намесніца старшыні Бабруйскага гарвыканкама Вольга Жук з букетам і падарункамі. «Тое, што перажылі Вы разам з роднымі, немагчыма ўявіць. Гэта было пекла на зямлі. Вы такая моцная, такая малайчына! Здароўя Вам моцнага! - пажадала Вольга Мікалаеўна.

Вера Сяргееўна шчыра ўзрадавалася кветкам, якія вельмі любіць, і зносінам, шмат расказвала пра сябе і дзялілася ўспамінамі. Яна кожны дзень дзякуе лёсу за мірнае неба і моліцца, каб усе жылі ў згодзе.

bobrlife.by