Журналістка аб працы ў сучасных умовах: наша аналітыка б'е прама ў мэту, мы на правільным шляху

Наша аналітыка б'е прама ў мэту, мы на правільным шляху. Такое меркаванне выказала вядучая праектаў тэлерадыёкампаніі «Магілёў» Віталіна Петрусевіч падчас Форума медыйнай супольнасці Беларусі, які праходзіць у Магілёве.

У сваім выступленні журналістка закранула пытанні аналітыкі ў рэгіянальных сродках масавай інфармацыі. «Не сакрэт, што да нядаўняга часу ў рэгіянальных СМІ быў відавочны дэфіцыт добрых аналітычных матэрыялаў, у тым ліку па вострасацыяльнай і палітычнай праблематыцы. Як мне падаецца, спакойны тэмп працы, местачковасць не дазвалялі рэгіянальным СМІ як след адказаць дэструктыўным сілам. Але час змяніўся, і мы зараз іншыя», - падкрэсліла яна.

Рэгіянальныя журналісты, тым маладзейшыя, заўсёды знаходзяцца ў гушчы падзей, звярнула ўвагу Віталіна Петрусевіч. «А калі раптам нехта яшчэ дагэтуль жыве па прынцыпе «мая хата з краю, нічога не ведаю», «палітыка гэта не маё, і па душы мне больш кветачкі», вызначайцеся: вы з намі ці не. Хаця гэта трэба было зрабіць яшчэ ўчора», - сказала яна.

Журналістка таксама расказала пра адзін з праектаў, шэф-рэдактарам якога яна з'яўляецца, і тыя поспехі, якіх яны дасягнулі за два гады існавання праграмы, дзе ўзнімаюць сацыяльныя, палітычныя, культурныя і гістарычныя пытанні. «Наша экспертная супольнасць разраслася і адужэла. Вельмі прыемна, што на нашых аналітыкаў-экспертаў зважаюць і сталічныя сродкі масавай інфармацыі. Напрацаваўшы досвед, кампанія плануе з восені 2024 года ўзмацніць аналітычны грамадска-палітычны блок у рэгіянальным эфіры, запусціўшы новы праект», - распавяла Віталіна Петрусевіч.

Закранула журналістка і пытанні хейта з боку апанентаў, якія выказваюць сваё меркаванне па-рознаму: каментарыі, блакіроўка ролікаў у сацыяльных сетках і на хостынгах і шмат іншага. «Калі мы настолькі раздражняем ворага, значыць усё правільна. Наша аналітыка б'е прама ў мэту, і мы на правільным шляху. Няхай страх трымае здраднікаў, іх доля ўсім вядомая», - сказала яна.

Звярнулася Віталіна Петрусевіч да сваіх калег і маладых журналістаў, якія сталі ўдзельнікамі форума. «Бярыцеся за сур'ёзныя тэмы рэпартажаў. Вывучайце, унікайце, пытайце, абмяркоўвайце, аналізуйце, - падсумавала яна. - Бо ў рэгіёнах ёсць усё для таго, каб стаць прафесійным і вядомым журналістам. Дарогу здужае ідучы».

БЕЛТА