Экалагічны студатрад прыступіў да працы ў Бялыніцкім раёне

Экалагічны студэнцкі атрад «Садружнасць» імя Героя Савецкага Саюза Б.Л.Хігрына ў складзе 9 навучэнцаў СШ №2 Бялынічаў і маладога настаўніка-камандзіра Кацярыны Журыкавай пачаў працу ў Бялыніцкім раёне.

Дзеці працуюць у якасці лесаводаў 2-га разраду на базе Тэхцінскага доследна-вытворчага лясніцтва ў пастаянным лясным гадавальніку, агульная плошча якога складае больш за 25 гектар.

У абавязкі байцоў студатрада ўваходзіць праполка пасеваў лясных культур і догляд іх.

Дарэчы, гэта ўжо другі студэнцкі атрад, сфарміраваны ў Бялыніцкім раёне з ліку навучэнцаў агульнаадукацыйных школ для працы ў пазаўрочны час. Першым быў будаўнічы і працаваў на базе СВК «Калгас «Радзіма».

Усяго сёлета плануецца працаўладкаваць у складзе студатрадаў 120 падлеткаў ва ўзросце ад 14 гадоў і старэйшых. Прымаючымі арганізацыямі згодна з рашэннем райвыканкама сталі Бялыніцкі лясгас, жылкамгас і ўсе сельгаспрадпрыемствы раёна.

zara.by