Магілёўскі гімнаст Ягор Шарамкоў заваяваў золата Гульняў БРІКС у вольных практыкаваннях

Беларускі гімнаст Ягор Шарамкоў стаў чэмпіёнам Спартыўных гульняў краін БРІКС у вольных практыкаваннях.

Спаборніцкую праграму другога дня ў гімнастаў адкрыў мужчынскі фінал у вольных практыкаваннях. Нашу каманду ў гэтым відзе прадставілі Яраслаў Крутаў, а таксама пераможца аднаго з этапаў Кубка свету 2024 года ў гэтай дысцыпліне Ягор Шарамкоў. Учорашні прызёр шматбор'я выйшаў на дыван адным з першых і адразу ж паказаў вынік, наблізіцца да якога не змог ніводны з канкурэнтаў, - 14,933 бала.

Яраслаў Крутаў не застаўся ў баку і таксама падняўся на пастамент, выйграўшы бронзу з сумай у 13,966 ачка, апярэдзіўшы тытулаванага расіяніна Артура Далалаяна. Паміж двума беларусамі ўклініўся алімпійскі чэмпіён з Расіі Мікіта Нагорны, які набраў 14,133 бала. Далей мужчыны выступяць у фіналах на кані і кольцах, а жанчыны разыграюць медалі ў апорным скачку і на брусах.

БЕЛТА