Буйніцкае поле і вядомыя людзі Беларусі. Навінкі патрыятычнай літаратуры прадставіў ВД «Звязда»

Аб навінках патрыятычнай літаратуры журналістам распавёў намеснік дырэктара Выдавецкага дома «Звязда» Уладзімір Мосін.

«У сувязі з сучаснымі выклікамі пісьменнік не застаецца ў баку ад палітычных падзей, адлюстроўваючы ў сваіх творах тое, што адбываецца. Усё часцей аўтары гавораць на тэмы, якія хвалююць усіх», - адзначыў Уладзімір Мосін. Ён дадаў, што гістарычная літаратура - адзін з самых папулярных жанраў сучаснасці.

Так, нядаўна ў свет выйшла кніга Мікалая Барысенкі «Буйніцкае поле: «Застацца і памерці». «Ужо распрададзены практычна ўвесь тыраж. У кнізе на падставе зноў адкрытых савецкіх і нямецкіх дакументаў расказваецца пра баі ў ліпені 1941 года за Магілёў на яго паўднёва-заходніх напрамках і перш за ўсё на гераічным Буйніцкім полі. Асобны раздзел прысвечаны савецкаму пісьменніку Канстанціну Сіманаву і яго сувязі з Магілёвам. Выданне разлічана на гісторыкаў, краязнаўцаў, ідэолагаў, музейных работнікаў, студэнтаў і ўсіх, хто цікавіцца ваеннай гісторыяй», - распавёў намеснік дырэктара.

Таксама як прыклад добрай патрыятычнай літаратуры ён назваў кнігу «Ведаем, ганарымся! Вядомыя людзі Беларусі ў партрэтах і нарысах» Ірыны Аўсеп'ян. «Гэта ўнікальны публіцыстычны праект, прысвечаны людзям, якія ўнеслі неацэнны ўклад у развіццё дзяржавы, культуры, літаратуры. Іх шматгранная дзейнасць, выдатныя творы, прызнаныя класікай, сталі сімвалам бескарыслівага служэння Айчыне. Менавіта пра гэтых людзей апавядае ў сваіх нарысах аўтар», - падзяліўся Уладзімір Мосін.

«Хочацца расказаць і пра кнігу «Равеснікі маладой Беларусі», якая нядаўна выйшла ў выдавецтве, складальнікам якой з'яўляецца Алена Пасюта. У кнізе прадстаўлены матэрыялы інфармацыйнага праекта, арганізаванага ў Гродзенскай вобласці. Яго ўдзельнікамі сталі маладыя людзі, якія змаглі самарэалізавацца як у асобасным, так і ў прафесійным плане. Пра гэта расказваюць героі кнігі на старонках выдання», - сказаў намеснік дырэктара.

БЕЛТА