Электразабеспячэнне пацярпелых ад непагадзі населеных пунктаў Магілёўскай вобласці адноўлена

У Магілёўскай вобласці аднавілі электразабеспячэнне пацярпелых ад непагадзі населеных пунктаў. Аб гэтым паведамілі ў прэс-службе Міністэрства энергетыкі.

У ведамстве нагадалі, што найбольш ад навальнічнага фронту са шквалістым ветрам пацярпелі Быхаўскі, Чавускі, Бабруйскі, Кіраўскі, Слаўгарадскі, Касцюковіцкі і Клімавіцкі раёны. «Ва ўхіленні тэхналагічных парушэнняў было задзейнічана больш за 100 аварыйных брыгад. У дапамогу магілёўскім энергетыкам былі накіраваны брыгады з іншых рэгіёнаў. На гэты час у вобласці адноўлены ўсе лініі электраперадачы 35 кВ і вышэй. Вядзецца праца па індывідуальных заяўках спажыўцоў па сетках 0,4 кв - плануецца, што яны будуць завершаныя на працягу дня», - адзначылі ў Мінэнерга.

Працягваюцца працы ў Гомельскай вобласці. Кіраўнік дзяржавы паставіў задачу на працягу сутак правесці расчыстку асноўных тэрыторый населеных пунктаў, якія пацярпелі ад непагадзі, каб забяспечыць энергетыкам доступ да электрасетак для ўстаранення парушэнняў.

За ноч пры садзейнічанні службаў МНС у рэгіёне адноўлена электразабеспячэнне 114 населеных пунктаў. Запитаны ўсе раённыя цэнтры. Паводле даных на 7.00, работы па ўстараненні парушэнняў прадаўжаюцца ў 494 населеных пунктах. Працуюць 197 аварыйных брыгад. Для часовага электразабеспячэння спажыўцоў задзейнічана 90 перасоўных дызель-генератарных установак арганізацый энергасістэмы, яшчэ 28 будуць дастаўлены ў рэгіён у бліжэйшы час. Сумесна з аблвыканкамам і МНС прапрацоўваюцца пытанні прыцягнення дадатковай колькасці дызельных генератараў.

Энергетыкі працуюць кругласутачна ва ўзмоцненым рэжыме. Аднаўленчыя работы абцяжарваюць навальніцы з дажджом і моцным ветрам, якія праходзяць сёння па тэрыторыі Гомельшчыны. Непагадзь можа выклікаць дадатковыя адключэнні па рэгіёне.

БЕЛТА