У Гродне прайшла творчая сустрэча са старшынёй Магілёўскага абласнога аддзялення Саюза пісьменнікаў Беларусі

У Гродзенскай абласной навуковай бібліятэцы ім. Я. Карскага прайшла сустрэча жыхароў Гродзеншчыны са старшынёй Магілёўскага абласнога аддзялення Саюза пісьменнікаў Беларусі, паэтам Алесем Казекам.

Творчая сустрэча паэта адбылася ў межах ініцыяванага пісьменнікамі Магілёўшчыны патрыятычнага літаратурнага марафону «Айчына. Дзяржава. Вера», прымеркаванага да сёлетняй электаральнай кампаніі ў Рэспубліцы Беларусь.

Ідэйны фундамент праекта - непарушнае адзінства духоўнасці і грамадзянскай свядомасці беларусаў, увасобленае паэтамі ў сакральным вобразе Радзімы і матыве любові да яе.

Слова беларускага паэта з Магілёва прагучала магутным гімнам, набатам і кранальнай споведдзю, не пакінуўшы абыякавым нікога з гродзенскіх аматараў літаратуры рознага ўзросту. На экране быў прадэманстраваны фрагмент драматычнай паэмы Алеся Казекі «Марыйка». Дзеянне ўсхвалявала, узрушыла ўсіх прысутных без выключэння і было ўспрынята аўдыторыяй са слязамі на вачах.

- Пакуль паэзія выклікае ў нас шчырыя пачуцці і непадробныя эмоцыі, трагічныя старонкі гісторыі не паўторацца, - падкрэсліў Аляксандр Казека.

Гарадзенскія пісьменнікі вырашылі далучыцца да патрыятычнага літаратурнага марафону «Айчына. Дзяржава. Вера» і правесці цыкл сустрэч з кіраўнікамі абласных аддзяленняў Саюза пісьменнікаў Беларусі.

mogilevnews.by