«Лакаматыў» адыграў адставанне ў тры шайбы і перамог «Магілёў» у экстралізе

Чатыры матчы ў панядзелак завяршылі гульнявую праграму 33-га тура рэгулярнага чэмпіянату беларускай хакейнай экстралігі сезона-24/25.

Лідэр турнірнай табліцы «Нёман» нечакана адчуў вялікія праблемы ў матчы супраць «Славуціча» ў Смаленску. Асноўны час паядынку скончыўся ўнічыю 2:2, і толькі ў серыі булітаў гродзенцы вырвалі перамогу. Абодва галы ў складзе падапечных Яўгена Летава правёў Мікіта Рэмезаў. Для клуба з Гродна гэта вікторыя стала 15-й запар.

У Магілёве мясцовы клуб прымаў «Лакаматыў». Пасля першага перыяду гаспадары дзякуючы дублю Іллі Шапіра вялі з адрывам у тры шайбы, але ў наступнай трэці аршанцы перахапілі лідэрства, закінуўшы чатыры разы запар. У заключнай 20-хвілінцы госці зафіксавалі канчатковы лік - 5:3.

Таксама ў панядзелак «Гомель» на выездзе абыграў «Хімік» з лікам 4:2, спыніўшы трохматчавую пераможную серыю навапалачан. У яшчэ адным паядынку вечара «Ліда» разабралася з «Брэстам»  (2:0), сухі матч у свой актыў запісаў галкіпер «рыцараў» Артур Малкаў. 

БЕЛТА