Сабаленка і Бардзілоўская падзялілі званне лепшай спартсменкі па версіі НАК

Тэнісістка Арына Сабаленка і батутыстка Віялета Бардзілоўская перамаглі ў намінацыі «Лепшая спартсменка» на Прэміі Нацыянальнага алімпійскага камітэта.

2024 год Сабаленка пачала з перамогі на адкрытым чэмпіянаце Аўстраліі - Арына стала першай тэнісісткай пасля Вікторыі Азаранкі, якая здолела абараніць тытул у Мельбурне. У верасні Сабаленка ўпершыню ў кар'еры перамагла на US Open, таксама ў мінулым сезоне Арына дайшла да паўфіналаў на «Ралан Гарос» і Уімблдоне, дадаўшы да асабістай калекцыі тытулы турніраў у Цынцынаці і Ухане. Раней беларуска была прызнана гульцом года WTA, надыходзячы год Сабаленка сустрэне ў рангу першай ракеткі жаночага сусветнага рэйтынгу.

Віялета Бардзілоўская прынесла Беларусі першы медаль летніх Алімпійскіх гульняў у Парыжы - у жаночых індывідуальных спаборніцтвах па скачках на батуце 19-гадовая спартсменка заваявала серабро. Гэта ўзнагарода стала для Бардзілоўскай дэбютнай на дарослым узроўні на міжнароднай арэне. У дзень народнага адзінства, 17 верасня, Віялета была ўдастоена ордэна Пашаны.

«Хачу падзякаваць арганізатарам за прызнанне, а балельшчыкам - за падтрымку, яна адчуваецца нават удалечыні ад дома. Спадзяюся прыносіць эмоцыі ў вашыя дамы і далей», - прызналася Сабаленка ў відэазвароце.

«Мне вельмі прыемна знаходзіцца ў адной зале з такімі выбітнымі людзьмі і да таго ж атрымаць такую высокую ўзнагароду. Хачу выказаць удзячнасць абсалютна ўсім», - сказала Бардзілоўская.

БЕЛТА