Генадзь Дзенгалёў: каб краіна развівалася, трэба праяўляць актыўнасць і ў паўсядзённых справах, і праз удзел у такіх важных палітычных падзеях, як выбары

Намеснік старшыні Магілёўскага аблвыканкама Генадзь Дзенгалёў сёння датэрмінова прагаласаваў на ўчастку для галасавання №2 у Магілёве, размешчаным у сярэдняй школе №21. Адказваючы на пытанне журналістаў аб тым, чаму важна прымаць удзел у выбарах, ён растлумачыў, што ўсё вельмі проста: «Першае - гэта грамадзянскі абавязак кожнага, а другое - упэўнены, што кожны з нас хоча ўдзельнічаць у развіцці нашай краіны. Для гэтага трэба праяўляць актыўнасць і ў паўсядзённых справах, і ўдзельнічаючы ў такіх важных палітычных падзеях, як выбары Прэзідэнта, якія вызначаюць будучыню і напрамкі развіцця любой суверэннай дзяржавы. У цэлым для кожнага чалавека выбары - гэта пэўная мера адказнасці і, вядома, свята. Бо гэта новы крок у нашым жыцці, чарговы этап развіцця нашай дзяржавы».

Як распавяла старшыня ўчастковай выбарчай камісіі ўчастку для галасавання №2 Юлія Пятакова, ужо на датэрміновым этапе галасавання адзначаецца дастаткова высокая яўка: «Сёння ў нас праходзіць трэці дзень датэрміновага галасавання. На гэтым этапе ўчастковая камісія працуе з 12.00 да 19.00, у асноўны дзень - з 8.00 да 20.00. Кожны грамадзянін Рэспублікі Беларусь мае магчымасць рэалізаваць сваё выбарчае права і аддаць голас за будучыню сваёй краіны.

Наш участак налічвае больш за 1,3 тыс. выбаршчыкаў, з іх восем - упершыню галасуючыя. Гэта хлопцы, якім на дзень выбараў споўніцца або споўнілася 18 гадоў. Для іх выбарчая камісія падрыхтавала падарункавае выданне «Сімвалы суверэннай Беларусі». Эксклюзіўныя падарункі прадаставіў і БРСМ - брэндаваныя майкі і значкі, якія адлюстроўваюць тое, што хлопцы ўпершыню аддалі свой голас у гэтыя выбары. Ужо па першых днях бачна - актыўнасць грамадзян дастаткова высокая».

Юлія Таранава, фота Галіны Гаўрыловіч