Больш за 1,2 тыс. школьнікаў перамаглі ў заключным этапе ўніверсітэцкіх алімпіяд

Больш за 1,2 тыс. школьнікаў перамаглі ў заключным этапе ўніверсітэцкіх алімпіяд. Аб гэтым паведамілі ў прэс-службе Міністэрства адукацыі.

Уладальнікамі дыпломаў І ступені сталі 240 чалавек, ІІ - 430, ІІІ - 583. Усяго пераможцамі сталі каля 1,26 тыс. выпускнікоў. Усе яны ў сакавіку будуць рэкамендаваны да залічэння без уступных іспытаў на запатрабаваныя спецыяльнасці ў рэгіянальныя ВНУ, на атрыманне статусу студэнта кожны з іх зможа разлічваць у пачатку ліпеня.

У адукацыйным ведамстве расказалі, што па традыцыі ў топ-5 папулярных напрамкаў у абітурыентаў-алімпіяднікаў увайшлі тэхнічныя (інжынерныя), лінгвістычныя і педагагічныя. «Сярод найбольш запатрабаваных спецыяльнасцяў - медыцынскія (ГрДМУ, ВДМУ, ГомГМУ). У лідэрах таксама спецыяльнасці «штучны інтэлект», «электронныя сістэмы і тэхналогіі» (БрДТУ), «гісторыя» і «сучасныя замежныя мовы» (ГрДУ імя Я.Купалы), «водныя біярэсурсы і аквакультуры», «абарона раслін і каранцін» (БДСГА)», - праінфармавалі ў .

У заключным этапе універсітэцкіх алімпіяд у 21 рэгіянальнай ВНУ прынялі ўдзел каля 3,6 тыс. абітурыентаў, што на 500 чалавек больш, чым у 2024 годзе. Уся працэдура праходзіла пад пільным кантролем Рэспубліканскага інстытута кантролю ведаў.

БЕЛТА