«Дынама-Шыннік» перапыніў серыю паражэнняў у МХЛ, узяўшы рэванш у «Чырвонай Арміі»

Хакеісты бабруйскага «Дынама-Шынніка» перапынілі серыю паражэнняў у рэгулярным чэмпіянаце Маладзёжнай хакейнай лігі сезона-24/25.

У чацвер падапечныя Андрэя Міхалёва другі раз за два дні сустракаліся з «Чырвонай Арміяй» у Маскве. Паядынак напярэдадні скончыўся буйной перамогай гаспадароў (6:1), сёння мацнейшымі былі ўжо беларусы. Нашы хлопцы закінулі па шайбе ў кожным з перыядаў, аўтарамі галоў сталі Мацвей Шыдлоўскі, Дзмітрый Тукач і Мікіта Паўлаў. Масквічы за 60 хвілін вызначыліся толькі аднойчы, у выніку 3:1 на карысць «Дынама-Шынніка».

Гэта перамога стала для бабруйскага клуба першай пасля серыі з чатырох паражэнняў. Наша каманда вярнулася на першае месца ў табліцы «Срэбнага» дывізіёна Заходняй канферэнцыі, абышоўшы «армейцаў» на адно ачко. Да канца рэгулярнага чэмпіянату дынамаўцам засталося правесці тры дамашнія гульні, у тым ліку дзве супраць «Чырвонай Арміі» (18 і 19 сакавіка). 14 сакавіка «шыннікі» прымуць «Амурскіх Тыграў» з Хабараўска.

БЕЛТА