Падведзены вынікі VI Нацыянальнага форуму «Музеі Беларусі»: прадстаўнікі Магілёўскай вобласці - у ліку лепшых

Вынікі VI Нацыянальнага форуму «Музеі Беларусі» падвялі ў Мінску. У рамках цырымоніі закрыцця мерапрыемства, якое адбылося ў выставачным цэнтры BELEXPO, адбылося ўзнагароджанне пераможцаў конкурсу прафесійнага майстэрства. Узнагароды лепшым музейшчыкам краіны ўручыў намеснік Міністра культуры Рэспублікі Беларусь Сяргей Саракач.

У намінацыі «За навацыі ў музейнай дзейнасці» дыпломам І ступені ўзнагароджаны Мсціслаўскі раённы гісторыка-археалагічны музей за праект віртуальнай рэальнасці «Лісты ваенных гадоў: голас сведкаў вайны». У намінацыі «За лепшае музейнае выданне» дыплома І ступені ўдастоены Шклоўскі раённы гісторыка-краязнаўчы музей за выданне мемуараў «Незгасальная слава камандзіра партызанскай брыгады «Чэкіст» Г.А.Кірпіча». У намінацыі «За лепшы экспазіцыйна-выставачны праект» дыпломам ІІ ступені адзначаны Магілёўскі абласны краязнаўчы музей ім. А.Р. Раманава за экспазіцыйны праект «80 рэліквій Вялікай Айчыннай вайны».

Нацыянальны форум «Музеі Беларусі» праводзіцца раз на тры гады і з'яўляецца адной з найважнейшых пляцовак для прэзентацыі музеяў і музейнай справы ў Рэспубліцы Беларусь.

Рэд.