Фестываль «Моладзь - за Саюзную дзяржаву» збярэ ў Магілёве каля тысячы ўдзельнікаў

XVIII фестываль «Моладзь - за Саюзную дзяржаву» пройдзе з 5 па 8 верасня ў Магілёве, паведамілі ў прэс-службе Парламенцкага сходу Беларусі і Расіі, які з'яўляецца арганізатарам мерапрыемства.

«XVIII фестываль «Моладзь – за Саюзную дзяржаву» прымеркаваны да 80-годдзя Перамогі ў Вялікай Айчыннай вайне. У рамках фестывалю адбудзецца конкурс выканаўцаў маладзёжнай песні і конкурс харэаграфічных калектываў. На сцэну выйдуць канкурсанты з усіх абласцей Беларусі і многіх рэгіёнаў Расіі. Іх выступленні ацэніць прафесійнае журы з вядомых артыстаў і музыкантаў. Плануецца, што ў мерапрыемствах прымуць удзел да тысячы чалавек, а разам з гледачамі і гасцямі - да 15 тысяч», - распавялі ў прэс-службе.

Акрамя музычнага і харэаграфічнага конкурсаў праграма фестывалю ўключае ўрачыстыя канцэрты адкрыцця і закрыцця з удзелам папулярных артыстаў з Беларусі і Расіі, майстар-класы ад членаў журы, творчыя лабараторыі, экскурсіі па гістарычных мясцінах і наведванне Мемарыяльнага комплексу «Буйніцкае поле», а таксама разнастайныя забаўляльныя праграмы.

Традыцыйна ўдзельнікі фестывалю сустрэнуцца з дэпутатамі Парламенцкага сходу, членамі Маладзёжнай палаты пры Парламенцкім сходзе, лідэрамі маладзёжных арганізацый і рухаў. Акрамя таго, будуць задзейнічаны маладзёжныя інтэрактыўныя зоны, запланаваны танцавальныя вечарыны, правядзенне флэшмобаў і іншыя мерапрыемствы.

Фестываль праводзіцца з ініцыятывы дэпутатаў Парламенцкага сходу з 2006 года. Упершыню фестываль адбыўся ў Анапе ў 2006 годзе. З 2007 па 2019 год фестываль праводзіўся ў Растоўскай вобласці, з 2022 па 2024 год - на тэрыторыі Смаленскай вобласці. У 2025 годзе фестываль праводзіцца ў рамках маладзёжнага форуму Саюзнай дзяржавы. У гэтым годзе фестываль упершыню прымае Беларусь - месцам правядзення стане Магілёў.

«Фестываль праводзіцца ў мэтах выхавання і грамадзянскага станаўлення моладзі Рэспублікі Беларусь і Расійскай Федэрацыі, захавання і развіцця культурнага патэнцыялу, садзейнічання рэалізацыі творчых здольнасцей і гарманічнага развіцця асобы, выяўлення і падтрымкі таленавітай творчай моладзі нашых краін. Фестываль «Моладзь - за Саюзную дзяржаву» - гэта эфектыўная сацыяльна-культурная пляцоўка для маладых людзей, якая садзейнічае збліжэнню моладзі Беларусі і Расіі», - дадалі ў прэс-службе.

БЕЛТА