Фестываль творчасці Саюзнай дзяржавы для людзей з інваліднасцю пройдзе ў Магілёве 23-26 верасня

Мерапрыемства Саюзнай дзяржавы «Фестываль творчасці інвалідаў «Разам мы зможам больш» пройдзе ў Магілёве 23-26 верасня. Пра гэта расказалі ў Магілёўскім абласным метадычным цэнтры народнай творчасці і культурна-асветнай работы.

У гэтым годзе ўдзел у фестывалі прымуць творчыя дэлегацыі рэгіёнаў Беларусі, горада Мінска і сямі рэгіёнаў Расійскай Федэрацыі: Маскоўскай, Бранскай, Калужскай, Пскоўскай, Цвярской, Смаленскай і Калінінградскай абласцей. Усяго 300 удзельнікаў з ліку людзей з абмежаванымі магчымасцямі здароўя ва ўзросце старэйшыя за 18 гадоў.

Кожны дзень фестывалю будзе прысвечаны асобнай тэме: Дзень Беларусі, Дзень Саюзнай дзяржавы, Дзень Расіі, Дзень творчых дасягненняў.

Конкурсныя выступленні ўдзельнікаў фестывалю пройдуць па 12 намінацыях: народныя, акадэмічныя, эстрадныя спевы, жэставыя спевы, харэаграфічнае мастацтва, музычна-інструментальнае выканальніцтва, аўтарская паэзія і бардаўская творчасць, тэатральнае мастацтва, мастацкае слова, арыгінальны жанр, дэкаратыўна-прыкладное і выяўленчае мастацтва.

У праграме фестывалю таксама запланаваны канцэрты з удзелам беларускіх і расійскіх артыстаў, удзельнікаў і гасцей фестывалю, выязныя канцэрты ў спецыялізаваныя ўстановы Чавускага і Магілёўскага раёнаў, выстава работ дэкаратыўна-прыкладнога і выяўленчага мастацтва, круглы стол, майстар-класы членаў журы, экскурсіі, гала-канцэрт і ўзнагароджанне пераможцаў і многае іншае.

Урачыстая цырымонія адкрыцця фестывалю творчасці інвалідаў «Разам мы зможам больш» адбудзецца 24 верасня ў канцэртнай зале Магілёўскага абласнога метадычнага цэнтра народнай творчасці і культурна-асветнай работы.

Як адзначылі арганізатары, з гэтага года фестываль будзе праводзіцца штогод.

БЕЛТА