Сапраўдны творчы абмен. У Магілёве пройдуць гастролі Бранскага абласнога тэатра драмы імя А.К. Талстога

У Магілёве пройдуць гастролі Бранскага абласнога ордэна Працоўнага Чырвонага Сцяга тэатра драмы імя А.К. Талстога 11 і 12 кастрычніка. Аб гэтым расказала дырэктар Магілёўскага абласнога драматычнага тэатра Вольга Кузняцова.

«Наш тэатр ужо даўно супрацоўнічае з расійскімі калегамі, з якімі склаліся трывалыя дружалюбыя адносіны. Мы абменьваемся гастролямі - у красавіку гэтага года бранская публіка вельмі цёпла прыняла нашых акцёраў, а пастаноўкі збіралі поўныя залы. Гэтаму садзейнічаюць агульныя культурныя карані, - падзялілася Вольга Кузняцова. - Гастролі - гэта сапраўдны творчы абмен, які дае магчымасць публіцы ўбачыць новыя пастаноўкі, а акцёрам і прафесіяналам - паглядзець, як працуюць калегі, нейкія сцэнічныя рашэнні. І, магчыма, нешта ўзяць сабе на заметку».

У кастрычніку расійскія акцёры на сцэне Магілёўскага абласнога драматычнага тэатра пакажуць тры пастаноўкі. Адна з іх - трагікамедыя ў двух актах «Аповеды цыніка». Спектакль створаны паводле гумарыстычных расказаў Аркадзя Аверчанкі. Азнаёміцца з пастаноўкай можна будзе 11 кастрычніка ў 18.30.

На сцэне ў Магілёве акцёры з Бранска прадставяць рамантычную камедыю «Каханне ў стылі барока». Гісторыя раскажа пра халасцяка, які стаіць перад няпростым выбарам: выканаць волю аднаго з бацькоў і ажаніцца ці страціць багаты маёнтак. У спектаклі пакажуць сапраўдныя хітраспляценні гэтай гісторыі. А вось фінал будзе зусім не такім, якім уяўляў яго сабе галоўны герой. Спектакль пройдзе на сцэне драмтэатра 12 кастрычніка ў 18.30.

Для самых маленькіх гледачоў і іх бацькоў падрыхтавалі добры і кранальны мюзікл «Адважнае шчаня Бенджамін». Пройдзе паказ 12 кастрычніка ў 12.00.

«Упэўнена, што нашы творчыя адносіны і абмен гастролямі зробяць культурнае жыццё Магілёўскай і Бранскай вобласці яшчэ больш разнастайнымі і цікавымі», - рэзюмавала Вольга Кузняцова.

БЕЛТА